Bələdiyyənin milyonlar dəyərində olan xidməti avtomobilləri müsadirə edildi

Türkiyənin Antalya vilayətinin Manavqat rayonunda torpaq sahələri avtodayanacaq tikintisi üçün müsadirə olunan, lakin illərdir kompensasiyalarını ala bilməyən 20 vətəndaşın hüquqi mübarizəsi onların xeyrinə başa çatıb.

Sonxeber.az xarici mediaya istinadla xəbər verir ki, məhkəmənin qərarına baxmayaraq, Manavqat Bələdiyyəsi təxminən 60 milyon lirə məbləğində borcu ödəmədiyi üçün icra prosesi başladılıb. Gecə saatlarında həyata keçirilən həbs tədbiri çərçivəsində bələdiyyənin yüksək vəzifəli şəxslərinin istifadə etdiyi ümumi dəyəri təxminən 7 milyon lirə olan üç lüks xidməti avtomobil polis nəzarəti altında cərimə meydançasına aparılıb.

Prosesi aparan vəkil Emre Erdoğan bildirib ki, məhkəmə qərarı əsasında borcun ödənilməsi üçün icra tədbirləri davam etdirilir. Onun sözlərinə görə, qapalı dayanacaqda olan daha bir xidməti avtomobilə isə hələlik əl qoymaq mümkün olmayıb.

Telegramda izləyin