Epşteyn üçün model qızların tədarükçüsünün meyiti yarıldı

Model qızların tədarükçüsü və qalmaqallı amerikalı maliyyəçi Ceffri Epşteynin ehtimal olunan şəriki Daniel Siadın meyitinin yarılması zamanı zorakı ölümə işarə edən əlamətlər aşkar edilməyib.

Oxu.Az xəbər verir ki, bu barədə "Franceinfo" radioşirkətinə istinadən Fransanın Nanter Prokurorluğu məlumat yayıb.

Bildirilib ki, yarılma zamanı Siadda səhhətinin pisləşməsinə işarə edən əlamətlər, həmçinin qəfil ölüm riskini artıra biləcək əvvəllər keçirdiyi infarktın izləri müəyyən edilib.

Radioşirkətin məlumatına görə, istintaq çərçivəsində əlavə toksikoloji ekspertizanın keçirilməsi də qərara alınıb.

Xatırladaq ki, iyulun 22-də Fransanın Kolomb kommunasında yerləşən evdə Ceffri Epşteynlə sıx əlaqələrdə şübhəli bilinən və model qızların tanınmış tədarükçüsü kimi tanınan Daniel Siadın öldüyü məlum olub. Onun meyiti iyulun 20-də aşkar edilib. Ölümün dəqiq səbəbi ilə bağlı rəsmi ekspertiza rəyi hələ açıqlanmayıb.

Telegramda izləyin