Seutada miqrant axınına qarşı dənizdə yeni maneələr quraşdırılır

Artan qeyri-qanuni miqrasiya fonunda İspaniya hökuməti Seutada yerləşən körpü ərazisində əlavə maneələr quraşdırmağa başlayıb.

Oxu.Az xəbər verir ki, bu məlumatı "Europa Press" agentliyi İspaniya hökumətinin bəyanatına əsaslanaraq yayıb.

Bildirilib ki, yerli vaxtla saat 07:50-də (Bakı vaxtı ilə 09:50) Seutadakı Tarajal körpüsünün ətrafında maneə sistemlərinin qurulmasına start verilib.

500 metr uzunluğa malik hava ilə doldurulmuş maneənin suüstü hündürlüyü 30-70 santimetr, sualtı dərinliyi isə bir metrə çatır. Həmçinin Mülki Qvardiya qayıqlarının sərhəd nəzarətini həyata keçirə bilməsi üçün maneə hissələri arasında xüsusi keçidlər saxlanılıb.

Agentliyin məlumatında vurğulanır ki, gecə saatlarında miqrantların əraziyə daxil olması tam olaraq dayandırılıb, Mərakeşə qayıdış prosesi isə heç bir ciddi insident qeydə alınmadan davam etdirilib.

Qeyd edək ki, cümə günü Seutanın rəhbəri Xuan Xesus Vivas son 24 saat ərzində Mərakeşdən şəhərə 60 minə yaxın insanın keçdiyini bəyan etmişdi. RTVE kanalının İspaniya Daxili İşlər Nazirliyinə istinadla verdiyi xəbərə görə, artıq 48 300-dən çox qeyri-qanuni miqrant yenidən Mərakeşə geri qaytarılıb.

Telegramda izləyin