Sahibkarlara ŞAD XƏBƏR: Bu xərclərdən azad olunacaqsınız

Qeyri-neft sektorunun inkişafı və ixracın stimullaşdırılması dövlətin iqtisadi siyasətində əsas prioritet istiqamətlərdən biri kimi ön plana çıxır. Bu çərçivədə Azərbaycan mənşəli qeyri-neft-qaz məhsullarını ixrac edən mikro, kiçik və orta sahibkarlıq subyektlərinə gömrük rəsmiləşdirilməsi xərclərinin dövlət tərəfindən kompensasiya olunmasını nəzərdə tutan yeni qərar biznes mühitində maraqla qarşılanıb. Bəs, bu dəstək mexanizmi sahibkarların ixrac imkanlarına, rəqabət qabiliyyətinə və ümumilikdə qeyri-neft ixracının inkişafına necə təsir göstərəcək?
Məsələ ilə bağlı Sonxeber.az-a açıqlama verən iqtisadçı ekspert Xalid Kərimli bildirib ki, bu, ixrac zamanı yaranan xərclərin sahibkarın üzərindən götürülməsinə xidmət edir.
"Bu dəstək mikro, kiçik və orta sahibkarlıq subyektlərini əhatə edir. Burada söhbət məhz ixracın rəsmiləşdirilməsi ilə bağlı xərclərdən gedir. İxracın özü üzrə vergi və ya rüsum tətbiq olunmasa da, rəsmiləşdirmə prosesində müəyyən xərclər yaranır. Bu tədbir həmin xərclərin qarşılanmasını təmin etməklə ixracın ümumi dəyərini azaldır və ixrac fəaliyyətini stimullaşdırır".

Ekspert bildirib ki, ixracın maya dəyərinin aşağı düşməsi sahibkarların bu sahəyə marağını artırır və onları xarici bazarlara çıxış barədə daha çox düşünməyə sövq edir:

"Uzunmüddətli perspektivdə dövlətin əsas məqsədi qeyri-neft ixracının həcmini artırmaqdır. Bu qərar da həmin məqsədə xidmət edən tədbirlərdən biridir. Belə ki, mikro, kiçik və orta sahibkarların ixracın rəsmiləşdirilməsi zamanı yaranan rəsmi xərcləri kompensasiya olunur və bununla da ixrac fəaliyyətinin təşviq edilməsi hədəflənir".

Röyalə Xəyal

Telegramda izləyin