The Spectator: "Ukrayna və İran müharibələri bir-birinə qarışmağa başlayır"

Ukrayna ilə Rusiya arasında davam edən müharibə və İran ətrafında artan gərginlik artıq ayrı-ayrı böhranlar deyil. "The Spectator" yazır ki, son hadisələr bu iki münaqişənin getdikcə bir-birinə bağlandığını göstərir.

Nəşrin təhlilinə görə, Ukraynanın Xəzər dənizində İranla əlaqəli hədəflərə pilotsuz uçuş aparatları ilə zərbələr endirməsi yeni mərhələnin başlanğıcı hesab olunur. Məqalədə qeyd edilir ki, Kiyev İranı hələ 2022-ci ildən, Rusiyaya "Şahed" pilotsuz aparatları göndərdiyi vaxtdan müharibənin iştirakçısı kimi qiymətləndirir.

Müəllif hesab edir ki, Ukrayna bu əməliyyatlarla ABŞ administrasiyasının dəstəyini gücləndirməyə çalışır. Xüsusilə hava hücumundan müdafiə sistemləri və "Patriot" raketlərinin çatışmazlığı fonunda Kiyev Vaşinqtonun diqqətini yenidən özünə yönəltmək istəyir.

Məqalədə vurğulanır ki, İran və Rusiya arasında hərbi əməkdaşlıq dərinləşdikcə, Ukrayna da İranla bağlı hədəfləri legitim hərbi obyekt hesab etməyə başlayıb.

Sonxeber.az The Spectator-a istinadən xəbər verir ki, bu isə Yaxın Şərqdəki böhranla Ukrayna müharibəsi arasındakı sərhədləri daha da zəiflədir.

"The Spectator"un qənaətinə görə, hadisələrin bu istiqamətdə inkişafı regional qarşıdurmaları daha geniş geosiyasi böhrana çevirə bilər.

Telegramda izləyin