Həqiqət gec-tez öz yerini tapacaq - Tanınmış cərrah

Son günlər ictimai fəal və xeyriyyə təşəbbüsləri ilə tanınan David Seliverstov ətrafında yayılan ittihamlar və qarayaxma kampaniyası cəmiyyətdə geniş müzakirələrə səbəb olub.

Məsələ ilə bağlı müxtəlif sahələrin tanınmış nümayəndələri öz mövqelərini açıqlayarkən, tanınmış cərrah həkim Qafarov Əşrəf Məhəmməd oğlu da səssiz qalmayıb.

Əşrəf Qafarov bildirib ki, hər hansı şəxs barəsində hökm verilməmiş, hüquqi faktlarla təsdiqlənməmiş iddialar əsasında ictimai qınaq yaratmaq nə hüquqi, nə də mənəvi baxımdan qəbulolunandır. Onun sözlərinə görə, cəmiyyət emosiyalarla deyil, faktlar və qanun çərçivəsində qərar verməlidir.

"Həkim kimi fəaliyyətim boyunca insanların həyatını xilas etməyə çalışmışam. Mənim üçün ən ali dəyər insan ləyaqətidir. Heç bir insan barəsində sübuta yetirilməmiş ittihamların yayılması, onun nüfuzuna zərbə vurulması doğru yanaşma deyil. Həqiqət gec-tez öz yerini tapacaq", - deyə Əşrəf Qafarov vurğulayıb.

Qafarov qeyd edib ki, cəmiyyət üçün faydalı layihələr həyata keçirən, sosial təşəbbüslərdə iştirak edən şəxslər haqqında fikir formalaşdırarkən yalnız təsdiqlənmiş məlumatlara əsaslanmaq vacibdir. O hesab edir ki, sosial şəbəkələrdə aparılan kampaniyalar hüquqi araşdırmaları əvəz edə bilməz.

O, həmçinin media nümayəndələrini peşəkar jurnalistika prinsiplərinə sadiq qalmağa çağıraraq bildirib ki, hər bir məlumat dərc edilməzdən əvvəl dəqiqləşdirilməli, qarşı tərəfin mövqeyi öyrənilməli və cəmiyyətə obyektiv informasiya təqdim olunmalıdır.

Əşrəf Qafarovun fikrincə, hüquqi dövlətdə hər kəsin müdafiə hüququ və ədalətli araşdırma aparılması təmin edilməlidir. O vurğulayıb ki, insanları əvvəlcədən günahkar elan etmək nə hüquq normalarına, nə də etik prinsiplərə uyğundur.

Sonda tanınmış cərrah qeyd edib ki, cəmiyyət birlik, qarşılıqlı hörmət və ədalət prinsiplərinə söykənməlidir. Onun sözlərinə görə, istənilən mübahisəli məsələnin həlli emosional mühakimələrlə deyil, qanunun aliliyi və obyektiv araşdırma yolu ilə mümkün olmalıdır.

Telegramda izləyin