Şimali Koreyanın Yaponiyaya hədəsi: Region yeni gərginlik mərhələsinə keçir? - POLİTOLOQDAN AÇIQLAMA

Şimali Koreya Yaponiyanın hərbi potensialını gücləndirməsini kəskin tənqid edərək Tokioya qarşı əlavə hərbi addımlar ata biləcəyi barədə xəbərdarlıq edib. Pxenyanqın bəyanatında Yaponiyanın ABŞ istehsalı olan "Tomahawk" qanadlı raketlərinin sınağını keçirməsi və Vaşinqtonla hərbi əməkdaşlığı genişləndirməsinin regional təhlükəsizliyi təhdid etdiyi iddia olunur.

Şimali Koreya rəhbərinin bacısı Kim Yo Con bildirib ki, bu addımlar davam edərsə, ölkə "əlavə hərbi seçimlərdən" istifadə edə bilər. Bu bəyanat Şərqi Asiyada təhlükəsizliklə bağlı narahatlıqları yenidən gündəmə gətirib.

Mövzu ilə bağlı politoloq Rəsul Tağıyev Sonxeber.az-a açıqlamasında bildirdi ki, Şimali Koreyanın Yaponiyaya yönəltdiyi son xəbərdarlıqlar ilk növbədə siyasi və psixoloji təzyiq xarakteri daşıyır. Onun sözlərinə görə, Pxenyan hesab edir ki, Yaponiyanın hərbi imkanlarını genişləndirməsi və ABŞ ilə müdafiə əməkdaşlığını gücləndirməsi onun təhlükəsizlik maraqlarına təhdid yaradır: "Buna görə də sərt bəyanatlarla həm Tokioya, həm də Vaşinqtona mesaj verməyə çalışır. Bununla yanaşı, bu cür ritorikanı tamamilə əhəmiyyətsiz hesab etmək olmaz. Çünki regionda hərbi fəallığın artması yanlış hesablamalar və ya təsadüfi insidentlər nəticəsində gərginliyin daha da yüksəlməsinə səbəb ola bilər.

Hazırkı mərhələdə tərəflərin birbaşa hərbi qarşıdurmaya getməsi ehtimalı yüksək görünməsə də, qarşılıqlı silahlanma yarışının sürətlənməsi və təhlükəsizlik mühitinin daha da həssaslaşması mümkündür. Bu isə təkcə Yaponiya və Şimali Koreyaya deyil, Cənubi Koreya, Çin və bütövlükdə Asiya-Sakit okean regionunun sabitliyinə təsir göstərən amillərdən biridir".

Telegramda izləyin