Şüşə eyvanlarda CİDDİ TƏHLÜKƏ: Ekspert AÇIQLADI

Şüşəli eyvanların geniş yayılması mənzillərdə əlavə istifadə sahəsi və estetik görünüş yaratsa da, bu cür konstruksiyaların layihələndirilməsi zamanı həm memarlıq, həm də təhlükəsizlik tələblərinə ciddi əməl olunması vacibdir. Xüsusilə yay aylarında günəş şüalarının birbaşa təsiri şüşəli eyvanlarda temperaturun kəskin yüksəlməsinə və istifadə üçün narahat şəraitin yaranmasına səbəb ola bilər.

Bəs, şüşəli eyvanların layihələndirilməsi zamanı hansı tələblər nəzərə alınmalı və həddindən artıq isinmənin qarşısını almaq üçün hansı texniki həllər tətbiq edilməlidir?
Məsələ ilə bağlı Sonxeber.az-a açıqlama verən inşaat məsələləri üzrə ekspert və memar Muxtar Ərturan bildirib ki, şüşəli eyvan yalnız estetik element kimi layihələndirilməməlidir.

"Burada konstruktiv təhlükəsizlik, günəş şüalanması, istilik komfortu, təbii havalandırma, şüşənin təhlükəsizliyi və fasadın külək yükü birlikdə hesablanmalıdır. Xüsusilə Bakı kimi günəşli və isti yay iqlimində adi şəffaf şüşə ilə tam qapadılmış eyvan çox sürətlə istixana effekti yarada bilər. Günəş enerjisi şüşədən içəri daxil olur, səthləri qızdırır və istilik qapalı məkanda toplanır. Nəticədə eyvanın temperaturu kəskin yüksəlir və bu istilik mənzilin daxilinə də ötürülür. Bu isə kondisionerin yükünü və enerji sərfiyyatını artırır".

Memar hesab edir ki, əsas həll yalnız "daha bahalı şüşə" seçmək deyil:

"Fasadın istiqamətinə uyğun günəş nəzarətli və Low-E şüşələr, xarici kölgələndirici elementlər, jalüz və lamellər, açılan şüşə hissələri və effektiv təbii havalandırma birlikdə layihələndirilməlidir. Xüsusilə qərb və cənub-qərb istiqamətində günəşdən qorunma daha ciddi əhəmiyyət daşıyır. Təhlükəsizlik də ayrıca məsələdir. Hündürmərtəbəli binalarda şüşənin qalınlığı və növü təsadüfi seçilə bilməz. Külək yükü, panel ölçüsü, bərkidilmə sistemi və insanın şüşəyə düşmə riski hesablanmalı, tələb olunan yerlərdə temperlənmiş və ya laminə edilmiş təhlükəsizlik şüşəsi tətbiq edilməlidir".

Onun sözlərinə görə, şüşəli fasad və eyvan gözəl görünə bilər, amma memarlıq yalnız görüntü deyil:

"Əgər yayda həmin məkan istifadə edilə bilmirsə, kondisioner yükünü artırırsa və təhlükəsizlik hesablamaları aparılmayıbsa, estetik baxımdan nə qədər cəlbedici olsa da, layihə funksional baxımdan uğurlu sayıla bilməz".

Röyalə Xəyal

Telegramda izləyin