Ermənistan ərazisində enerji dəhlizinin yaradılması TRIPP və bütün bölgə üçün müsbət nəticə verəcək

Bu gün Azərbaycanın yaratdığı tarixi reallıqların məntiqi nəticəsi olaraq ölkəmiz yeni mərhələni yaşayır. Azərbaycanın öz suverenliyinin bərpası, Qarabağın azad olunması, eləcə də Qarabağdan separatizmin təmizlənməsi yeni imkanlar yaratmış oldu. Prezident, Müzəffər Ali Baş Komandan İlham Əliyevin rəhbərliyi ilə Azərbaycan Silahlı Qüvvələri həm Vətən müharibəsində, həm də lokal antiterror tədbirləri zamanı peşəkarlığını, qarşısına qoyulmuş vəzifələri ən yüksək səviyyədə icra etmək məharətinə malik olduğunu bir daha nümayiş etdirdi. Artıq 30 ilə yaxın işğal altında olan və 44 günlük Vətən müharbəsi zamanı azad olunan hər bir ərazidə böyük abadlıq-quruculuq işləri aparılır. İşğaldan azad olunan ərazilərimizdə Qarabağ və Şərqi Zəngəzur iqtisadi rayonlarında genişmiqyaslı yenidənqurma, bərpa-quruculuq işləri davam etdirilir. Bu böyük işlərlə yanaşı ölkənin digər bölgələri də yaddan çıxarılmayıb, hər yerdə böyük quruculuq işləri həyata keçirilir. Aparılan quruculuq işləri Naxçıvandan da yan keçməyib.
Avqustun 11-də Azərbaycan Prezidenti İlham Əliyev və birinci xanım Mehriban Əliyeva Naxçıvan Muxtar Respublikasına səfərə gəliblər. Prezident seçildikdən sonra 17-ci dəfə Naxçıvana gələn ölkə başçısı burada bir sıra obyektlərin açılışında, təməlqoyma mərasimlərində iştirak edir, Naxçıvanın sosial-iqtisadi inkişafına töhfə verəcək obyektlərdə aparılan işlərlə tanış olub.
Naxçıvan Muxtar Respublikasına səfəri çərçivəsində Azərbaycan Prezidenti İlham Əliyev Azərbaycan Televiziyasına geniş müsahibə verib. Cənab Prezident AzTV-yə müsahibəsində Azərbaycan Silahlı Qüvvələrinin bölgədə söz sahibi olduğunu deyib. Dövlətimizin başçısı, həmçinin Naxçıvanda hərbi potensialın gündən-günə gücləndirildiyini və bundan sonra da gücləndiriləcəyini bildirib. Bu istiqamətdə də böyük işlər görülüb, ölkə başçısının müvafiq Sərəncamı ilə Əlahiddə Ümumqoşun Ordu və yeni komando qüvvələri yaralıb, Naxçıvandakı hərbi hissələri ən müasir texnika və digər vasitələrlə təchiz edilib, bu da Azərbaycan Silahlı Qüvvələrində son vaxtlar müşahidə olunan mənzərədir. Azərbaycan Televiziyasına müsahibəsində Prezident İlham Əliyev xususi qeyd edib ki, "Bu gün Azərbaycan Silahlı Qüvvələri bölgədə söz sahibidir. O cümlədən Naxçıvanda hərbi potensial gündən-günə gücləndirilir və gücləndiriləcək".
Müsahibədə həmçinin Naxçıvanın enerji təminatı və enerji təhlükəsizliyi ilə bağlı məsələlərə geniş yer ayrılıb. Ölkə başçısı bu gün Azərbaycanın regionda elektrik enerjisi ilə problemi olmayan nadir ölkə olduğunu bildirib. "Çünki bu və ya digər səbəblər üzündən bölgəmizdə enerji böhranı yaşanmaqdadır və bu böhran dərinləşə bilər. Həm bölgəmizdə gedən müharibələr, həm artan risklər, enerji daşıyıcılarının nəqli ilə bağlı nəqliyyat zəncirlərinin qırılması və digər amillər. İstisna edilmir ki, gələcəkdə yeni xoşagəlməz hadisələr baş verməsin", - deyə dövlətimizin başçısı vurğulayıb.
Bildirilib ki, gündəlikdə olan məsələlərdən biri Ordubad rayonunun Tivi kəndindəki 15 meqavatdan bir qədər çox gücdə su elektrik stansiyasının layihəsidir. Bu stansiyanın davam etdirilməsi üçün dövlət tərəfindən vəsait ayrılacaqdır. Burada yerli investorlar tərfində 50 meqavatlıq Günəş elektrik stansiyaları inşa edilir. Xarici investorlar da bura maraq göstərirlər
Hazırda Naxçıvanda Günəş enerjisinin potensialı çox böyükdür. Aparılan monitorinq və dəqiq təhlil əsasında Günəş elektrik enerjisinin istehsalı üçün Azərbaycan ərazisində ən əlverişli məkan Naxçıvandır. Artıq Naxçıvanda yüzlərlə meqavat gücündə Günəş elektrik stansiyalarının inşa ediləcəyi 600 hektardan çox ərazi müəyyən edilib. "Qonşu ölkələrə ixrac imkanlarımızı genişləndirərək biz, eyni zamanda, Avropa bazarına da çıxacağıq. Çünki biz indi Avropaya neftimizlə, qazımızla çıxmışıq. Ancaq biz elektrik enerjisi ilə də çıxmaq istəyirik", - deyə dövlətimizin başçısı qeyd edib.
Bu gün ölkəmizin enerji xətləri Rusiya, İran, Gürcüstanla, Gürcüstan vasitəsilə Türkiyə ilə birləşdirilib. Ona görə Ermənistan ərazisindən Naxçıvana, ondan sonra Türkiyəyə və Avropaya uzanacaq enerji dəhlizi, eyni zamanda, Ermənistanın enerjisisteminin ayaqda qalmasına imkan yaradacaq. Qabaqlayıcı tədbirlər olaraq son beş ildə Kəlbəcər dağlarında, 3500 metr yüksəkliklərdə qarın içində dirəklər quraşdırılıb.
Ölkə başçısının müsahibəsində qeyd etdiyi kimi: "Amma Ermənistan təbii ki, özü bunu etməlidir. Ona görə hesab edirəm ki, bu məsələyə tezliklə aydınlıq gətirilməlidir. Bu, Zəngəzur dəhlizinin, TRIPP-in ayrılmaz hissəsi olacaq. Çünki bu layihə təkcə dəmir yolu, avtomobil yolu deyil. Hətta buradan fiber-optik kabel, ondan sonra elektrik xətləri, gələcəkdə əgər ehtiyac olarsa, neft-qaz kəmərləri də keçə bilər".
Bu gün bölgədə yeganə ixrac marşrutu - Gürcüstan, Türkiyə, ondan sonra Avropa marşrutudur. Bu marşrut gələcəkdə genişləndirilməlidir. Həmçinin, Qara dəniz enerji kabelinin layihəsinin texniki-iqtisadi əsaslandırılması hazırdır. İkinci xətt olarsa, bu ancaq bizim gücümüzü artıracaqdır.
Prezident İlham Əliyevin Naxçıvan şəhərində Azərbaycan Televiziyasina verdiyi müsahibədə bildirib ki, Azərbaycan həm elektrik enerjisini istehsal edən, qəbul edən, ötürən və ixrac edən ölkə kimi özünü göstərəcək. "Yəni bizim strateji baxışlarımız və planlarımız bundan ibarətdir. Yenə də deyirəm, bu planlar bizim bütün həndəvərimizdə yerləşən ölkələrin maraqlarına cavab verir. Sadəcə olaraq, burada koordinasiya işləri düzgün səviyyədə, lazımi səviyyədə aparılmalıdır və danışıqlar sürətləndirilməlidir. Deyə bilərəm ki, bu gün həm Türkiyə ilə, həm İranla bu barədə danışıqlar aparılır. Hələ ki, bir şey demək tezdir. O ki qaldı, Ermənistana, yenə də demək istəyirəm, Ermənistan ərazisində enerji dəhlizi nə qədər tez yaranarsa, o qədər də TRIPP üçün və bütün bölgə üçün yaxşı olar" deyə cənab Prezident əavə edib.

Həcər Verdiyeva - Tarix elmləri doktoru, professor

Telegramda izləyin