Prosesdə əsas yük Ermənistanın üzərinə düşür - POLİTOLOQ

Azərbaycan, Ermənistan və ABŞ nümayəndələrinin üçtərəfli görüşünün Vaşinqton Sammitinin birinci ildönümündə keçirilməsi regionda formalaşan yeni siyasi reallıqlar fonunda diqqət çəkir. Görüşdə Azərbaycan-Ermənistan normallaşma prosesi, sərhədlərin delimitasiyası və etimad quruculuğu tədbirləri müzakirə olunub.

Bəs, bu format regionun geosiyasi mənzərəsinə və Azərbaycan-Ermənistan münasibətlərinin gələcəyinə necə təsir göstərə bilər və üçtərəfli dialoq sülh prosesinin davamlı irəliləməsinə hansı töhfəni verə bilər?
Məsələ ilə bağlı Sonxeber.az-a açıqlama verən politoloq Samir Hümbətov bildirib ki, burada bir neçə amil önə çıxır ki, bunlardan birincisi tərəflərin iradəsidir:

"Tərəflər sülhə doğru atılacaq addımlara hazır olmalı və istər daxili, istərsə də xarici amillərin təsirinə baxmayaraq, sülh istiqamətində qəti addımlar atmağı bacarmalıdır. Bu, xüsusilə Ermənistan üçün əsas şərtdir. Çünki prosesdə əsas yük onun üzərinə düşür. İkinci məsələ xarici amillər, yəni beynəlxalq şəraitdir. Əgər beynəlxalq şərait regionda sülhün yaradılması, bu sülhün uzunmüddətli, dayanıqlı və davamlı olması üçün imkan verərsə və tərəflər də bundan maksimum dərəcədə müsbət istiqamətdə yararlanarsa, nəticə əldə etmək mümkündür".

Politoloq bildirib ki, əka halda, istər region dövlətlərinin, istərsə də qeyri-region dövlətlərinin prosesə təsirləri artarsa və bu dövlətlər regiona ciddi şəkildə cəlb olunarsa, proses ləngimə mərhələsinə keçə bilər:

"Amma son vaxtlar görünən odur ki, tərəflərdən müsbət istiqamətdə mesajlar hiss olunur. Azərbaycanın uzatdığı sülh budağına Ermənistan tərəfindən də müəyyən işarəedici cavab var. Lakin bunu yalnız sözlə deyil, əməllə də görməliyik. Digər məsələ isə Amerika Birləşmiş Ştatları ilə bağlıdır".

Onun sözlərinə görə, hazırda ABŞ İranla müharibə vəziyyətindədir və müharibə aparır:

"Belə olan halda ABŞ-ın diqqəti daha çox həmin məsələyə yönəlib. Amma buna baxmayaraq, Amerika Birləşmiş Ştatları Cənubi Qafqazda sülhün olmasını həqiqətən istəyəcəksə, sülhün əldə edilməsi reallığa çevrilə bilər".

Röyalə Xəyal

Telegramda izləyin