ABŞ-də bir gündə 3 nəfər edam ediləcək - 16 il sonra ilk

ABŞ-də ölüm cəzasına məhkum edilmiş üç nəfərin müxtəlif ştatlarda eyni gündə edam edilməsi planlaşdırılır.

"Qafqazinfo" xəbər verir ki, Tennessi, Alabama və Oklahomada edamları nəzərdə tutulan Entoni Darrel Hayns, Ceremi Uilyams və Karlos Kuesta-Rodriqezin cəzalarının icrası baş tutarsa, bu, 16 ildən sonra ABŞ-də eyni gündə üç edamın həyata keçirilməsi olacaq.

Son illərdə ABŞ-də edamların sayı da əhəmiyyətli dərəcədə artıb. 2025-ci ildə ölkədə 47 edam həyata keçirilib. Bu göstərici 2021-ci illə müqayisədə dörd dəfədən çox artım deməkdir.

Bu artım ABŞ Prezidenti Donald Trampın siyasəti və bəzi ştat qubernatorlarının ölüm cəzası ilə bağlı mövqeyi ilə əlaqələndirilir.

Tramp 2025-ci ildə prezident vəzifəsinə başladığı ilk gün federal səviyyədə ölüm cəzasının tətbiqinin bərpasına yönəlmiş sərəncam imzalayıb. Bundan əlavə, ABŞ Ədliyyə Nazirliyi edam proseslərinin sürətləndirilməsi üçün prosedurları yeniləyib və edam dəstəsi kimi üsulları protokollara daxil edib.

Ştatlar arasında Florida həyata keçirilən edamların sayına görə önə çıxır. 2025-ci ildə ABŞ-də icra olunan 47 edamın təxminən 40 faizi Floridada həyata keçirilib.

Florida qubernatoru Ron DeSantisin dövründə qəbul edilən qanunvericiliklə ölüm cəzasının tətbiqi üçün tələb olunan münsiflər heyətinin səs çoxluğu ilə bağlı qaydalar dəyişdirilib. Ştatda 12 yaşdan kiçik uşaqlara qarşı cinsi istismara görə də ölüm cəzasının tətbiqinə imkan verən qanun qəbul edilib.

Hazırda ölüm cəzası ABŞ-nin 50 ştatından 27-də qanunidir. Kaliforniya, Ohayo, Oreqon və Pensilvaniyada isə edamların icrası qubernatorların qərarları ilə dayandırılıb.

Edamların sayının artmasına baxmayaraq, ABŞ-də ölüm cəzasına ictimai dəstək azalmaqda davam edir. Araşdırmalara görə, ölüm hökmünü mənəvi baxımdan məqbul hesab edənlərin payı 52 faizə düşüb. Bu, 1970-ci illərdən bəri ən aşağı göstəricidir.

Məhkəmələr tərəfindən çıxarılan ölüm hökmlərinin sayı da kəskin azalıb. 1990-cı illərdə ABŞ-də hər il 300-dən çox ölüm hökmü çıxarılırdısa, 2025-ci ildə bu rəqəm 23-ə düşüb.

Telegramda izləyin