İnflyasiya ARTACAQ: Ərzaq qiymətləri BAHALAŞACAQ

2026-cı ilin yanvar-iyul aylarında Azərbaycanda istehlak qiymətləri ötən ilin eyni dövrü ilə müqayisədə 5,7 faiz artıb. Xüsusilə ərzaq məhsullarında qiymət artımının daha yüksək olması istehlakçıların gündəlik xərclərinə birbaşa təsir göstərir.

Bəs, qiymət artımının əsas səbəbləri nələrdir, daha çox bahalaşan sahələrdə bu tendensiyanın qarşıdakı aylarda davam etməsi gözlənilirmi və qiymət artımının qarşısını almaq üçün hansı amillər nəzərə alınmalıdır?
Məsələ ilə bağlı Sonxeber.az-a açıqlama verən iqtisadçı ekspert Xalid Kərimli bildirib ki, inflyasiyanın daha da sürətlənərək 6 faizin üzərinə qalxacağını gözləyir:

"Əvvəlki proqnozlar inflyasiyanın 6 faizdən aşağı olacağı ilə bağlı idi. İndi isə Mərkəzi Bankın revizə edilmiş proqnozlarına görə, inflyasiyanın 6,1 faizə qədər yüksələcəyi gözlənilir. Yəni inflyasiya artacaq. Bunun əsas səbəbləri həm ölkədaxili, həm də ölkəxarici amillərlə bağlıdır. Əsas amillərdən biri idxaldır. İdxal qiymətləri artır və bu da idxal inflyasiyası vasitəsilə ölkə daxilində qiymətlərə təsir göstərir".

Ekspert bildirib ki, əsas səbəb Tarif Şurasının müvafiq qərarlarıdır:

"Son iki ildə enerji daşıyıcılarının və kommunal xidmətlərin qiymətlərinin artması nəticə etibarilə həm daşınma, həm də istehsal xərclərini artırır. Bununla yanaşı, insanların əməkhaqları da artır. Məsələn, bu il əməkhaqları əvvəlki illə müqayisədə 7 faizdən bir qədər çox, ondan əvvəlki il isə 9 faiz artıb. Bunların hamısı istehsal və daşınma xərclərini artırır və nəticə etibarilə qiymətlərin yüksəlməsinə təsir göstərir".

Onun sözlərinə görə, qiymət artımı davam edəcək:

"Çünki dünyada proseslər hələ də sabitləşmir. Qara dənizdə, Hörmüz boğazında və müəyyən vaxtlarda Qırmızı dənizdə gərginlik var. Eyni zamanda, enerji qiymətləri də yüksəkdir. Ona görə qiymətlərin aşağı düşəcəyini gözləmirəm. İdxal inflyasiyası vasitəsilə qiymət artımının davam edəcəyini düşünürəm".

Röyalə Xəyal

Telegramda izləyin