Bu şəxslər vergi və ciddi hüquqi risklərlə qarşılaşa bilər - XƏBƏRDARLIQ

Əmlakın, xüsusilə də qeyri-yaşayış sahəsinin fərdi sahibkara icarəyə verilməsi zamanı tərəflər arasında yazılı müqavilənin olmaması həm hüquqi, həm də vergi baxımından müəyyən risklər yarada bilər. İcarə münasibətlərinin rəsmiləşdirilməsi, ödənişlərin sənədləşdirilməsi və vergi öhdəliklərinin düzgün yerinə yetirilməsi sonradan yarana biləcək mübahisələrin qarşısının alınması baxımından mühüm əhəmiyyət daşıyır. Vergi qanunvericiliyinə əsasən, fiziki şəxsin əmlakını vergi ödəyicisi kimi uçotda olan şəxsə icarəyə verməsi zamanı icarə haqqından 14 faiz dərəcə ilə vergi ödəmə mənbəyində tutulur.

Bəs, əmlakını fərdi sahibkar olan qohumuna yazılı müqavilə olmadan icarəyə verən şəxs hansı vergi və hüquqi risklərlə üzləşə bilər, icarə gəliri necə rəsmiləşdirilməli və verginin ödənilməsi hansı qaydada həyata keçirilməlidir?

Məsələ ilə bağlı Sonxeber.az-a açıqlama verən vergi eksperti Vəli Əliyev bildirib ki, praktiki olaraq belə bir hal mümkün deyil:

"Çünki həmin əmlakı müqaviləsiz icarəyə götürən sahibkar, məsələn, anbar, mağaza və ya digər obyekt kimi istifadə edirsə, həmin obyekti vergi orqanında qeydiyyata almalıdır. Vergi orqanında qeydiyyat zamanı isə icarə müqaviləsinin təqdim edilməsi tələb olunur. O baxımdan, sahibkar əmlakı icarəyə götürürsə, birmənalı şəkildə müqavilə bağlanmalıdır. Əks halda həmin obyekt vergi orqanında qeydiyyata alına bilməz. Buna görə də qohumun əmlakı sahibkara icarəyə verməsi, lakin bunun rəsmiləşdirilməməsi praktiki olaraq mümkün deyil".

Röyalə Xəyal

Telegramda izləyin