Üzərinə ağac aşan avtomobilin ziyanını kim ödəməlidir? - AÇIQLAMA

Avtomobilin üzərinə ağac aşması nəticəsində yaranan zərərin kimin tərəfindən ödənilməsi ağacın yerləşdiyi ərazi, ona qulluq və nəzarətə cavabdeh qurumun müəyyən edilməsi ilə bağlıdır. Belə hallarda avtomobilin icbari sığortası adətən bu zərəri qarşılamır, çünki bu sığorta avtomobilin istifadəsi nəticəsində üçüncü şəxslərə vurulan zərəri əhatə edir.

Bəs, ağacın aşmasına görə məsul qurum necə müəyyən edilir, KASKO olmadıqda avtomobil sahibi dəymiş zərərin ödənilməsi üçün hara müraciət etmək lazımdır?
Məsələ ilə bağlı Sonxeber.az-a açıqlama verən sığorta eksperti Emil Ağabağırov bildirib ki, ağacın qoparaq avtomobilin üzərinə düşməsi və avtomobili zədələməsi yalnız KASKO sığortası üzrə qarşılana bilər. Çünki KASKO könüllü sığorta növüdür.

"İstər ağacın avtomobilin üzərinə düşərək zədələməsi, istər hansısa reklam panelinin avtomobilin üzərinə düşməsi, binanın üzərindən fasadın qoparaq avtomobili zədələməsi, istərsə də hər hansı şəxsin bilərəkdən və ya bilməyərəkdən avtomobilə hər hansı predmetlə zərər vurması kimi hallar KASKO sığortası üzrə qarşılanır. Digər tərəfdən, avtomobilə dəymiş zərər bəzi hallarda başqa sığorta növü üzrə də qarşılana bilər. Məsələn, qeyri-yaşayış obyektləri üçün "Daşınmaz əmlakın istismarı ilə bağlı mülki məsuliyyətin icbari sığortası" mövcuddur. Hər hansı şirkət və ya qeyri-yaşayış obyekti bu sığorta məhsulunu əldə edibsə və həmin obyektin fəaliyyəti nəticəsində digər əmlaka zərər dəyibsə, bu, sığorta hadisəsi hesab oluna və zərər qarşılana bilər".

Ekspert bildirib ki, hər hansı qeyri-yaşayış obyektində yanğın və ya partlayış baş verib, nəticədə yanğın avtomobilə keçib və ya partlayış zamanı hər hansı predmet avtomobilin üzərinə düşərək onu zədələyibsə, bu halda həmin zərər qeyd edilən sığorta növü üzrə qarşılana bilər. Amma digər hallarda, xüsusilə də ağacın avtomobilin üzərinə düşərək onu zədələməsi zamanı avtomobilin KASKO sığortası yoxdursa, bu artıq sığorta tərəfindən qarşılanan hadisə deyil.

Röyalə Xəyal

Telegramda izləyin