Milyarder tərk edilmiş bir adanı alıb, cənnətə çevirdi

Şotlandiyada illərlə tənəzzül yaşayan Tanera-Mor adası milyarderin böyük investisiyasından sonra yenidən canlanmağa başlayıb.

Lent.az xarici mediaya istinadla xəbər verir ki, fond rəhbəri və milyarder Yan Veys 2017-ci ildə Şotlandiyanın şimal-qərb sahillərində yerləşən adanı təxminən 2,2 milyon dollara satın alıb.

Daha sonra onun bərpasına ümumilikdə 135 milyon dollara yaxın vəsait yatırıb. Veys adanı aldığı zaman burada tarixi tikililər dağılır, əhali azalır, torpaq sahələrinin böyük hissəsi isə baxımsız qalırdı. O, adanı şəxsi istirahət məkanına çevirmək əvəzinə burada yaşayışın və yerli iqtisadiyyatın bərpasına yönəlmiş geniş layihəyə başlayıb.

Layihə çərçivəsində 50-dən çox bina, o cümlədən köhnə kotteclər bərpa edilib. Adada təxminən 7 kilometr yol salınıb, piyada marşrutları yaradılıb.

Ekoloji bərpa işləri də geniş miqyas alıb. Tanera-Morda 100 mindən çox ağac əkilib, səkkiz göl və su hövzəsi bərpa olunub. Təxminən 28 akr tarixi kənd təsərrüfatı sahəsi yenidən istifadəyə verilib, köhnə bağların və otlaqların bərpasına başlanılıb.

Tanera-Mor vaxtilə siyənək balıqçılığının mühüm mərkəzlərindən biri olub. 1784-cü ildə burada yaradılmış balıqçılıq stansiyası bir vaxtlar təxminən 120 nəfəri işlə təmin edib. Balıqçılığın tənəzzülü ilə ada sakinləri tədricən ərazini tərk ediblər.

Adanın yenidən qurulması zamanı ənənəvi Şotlandiya sənətkarlığının dirçəldilməsinə də xüsusi diqqət ayrılıb. İki qədim balıqçı qayığı təmir olunub və onların bərpasına ustalar təxminən 16 min saat əmək sərf ediblər.

Burada ənənəvi Tanera tvidinin toxunması üçün dəzgah fəaliyyətə başlayıb. Adada yelkənçilik, çörəkbişirmə, incəsənət, bağçılıq və torpağa qulluqla bağlı emalatxanalar da yaradılıb.

Tanera-Morda pab, ibadətgah, rəsm studiyası, kinoteatr, idman zalı, sauna və ümumi mətbəx kimi ictimai məkanlar istifadəyə verilib. Keçmiş daş karxanası isə ofislər, yaşayış yerləri və emalatxanalardan ibarət kompleksə çevrilib.

Ada həmçinin tibb işçiləri, polis əməkdaşları və hərbçilər də daxil olmaqla dövlət xidmətlərində çalışan şəxsləri qəbul edir. Layihənin başlanmasından bu yana burada 1300-dən çox belə əməkdaşın olduğu bildirilir.

Hazırda layihə regionda yeni iş yerlərinin yaranmasına da imkan verir. Daimi işçilərin 60 faizdən çoxu Şotlandiya dağlıq bölgəsinin sakinləridir. Eyni vaxtda adada təxminən 150 nəfər yaşaya və işləyə bilir.

Telegramda izləyin