Ürəyiniz üçün portağal yeyin

Portağal həm dadlı, həm də sağlamlıq baxımından olduqca qiymətli sitrus meyvəsidir. Xüsusilə beyin və ürək sağlamlığının qorunmasında mühüm rol oynayan qida maddələri ilə zəngindir.

Sonxeber.az xəbər verir ki, gün ərzində bir dəfə yemək sağlamlığınıza müsbət təsir edə bilər. Mütəxəssislər bildirir ki, bu sitrus meyvəsi tək immunitet yüksəltmir, həmçinin ürək və beyni qoruyur:

Beyin sağlamlığına faydaları

Portağalın tərkibində olan C vitamini güclü antioksidant kimi fəaliyyət göstərərək beyin hüceyrələrini zədələnmədən qoruyur. Bu isə yaddaşın güclənməsinə və zehni fəaliyyətin yaxşılaşmasına kömək edir. Bundan əlavə, portağalda olan flavonoidlər beyin qan dövranını artıraraq konsentrasiyanı yüksəldə bilər. Araşdırmalar göstərir ki, müntəzəm sitrus meyvəsi qəbulu yaşla bağlı yaddaş zəifləməsinin qarşısını almağa dəstək olur.

Ürək sağlamlığına təsiri

Portağal ürək-damar sistemi üçün də olduqca faydalıdır. Onun tərkibindəki kalium qan təzyiqini tənzimləməyə kömək edir və ürəyin normal fəaliyyətini dəstəkləyir. Eyni zamanda, liflə zəngin olması "pis" xolesterinin (LDL) səviyyəsini azaltmağa kömək edir. Bu da ateroskleroz və digər ürək xəstəliklərinin riskini aşağı sala bilər.

Digər sağlamlıq üstünlükləri
İmmuniteti gücləndirir
Orqanizmi toksinlərdən təmizləməyə kömək edir
Dəri sağlamlığını yaxşılaşdırır
Həzm sistemini dəstəkləyir

Gündəlik rasionda 1 ədəd orta ölçülü portağal və ya bir stəkan təzə sıxılmış portağal şirəsi kifayət edir. Lakin şəkər səviyyəsinə diqqət edən şəxslər meyvəni bütöv şəkildə qəbul etməyə üstünlük verməlidir.

Mədə turşuluğu yüksək olan şəxslər portağalı həddindən artıq istehlak etməməlidir. Həmçinin bəzi dərmanlarla qarşılıqlı təsir ehtimalı olduğundan, xroniki xəstəliyi olanlar həkim məsləhəti almalıdır.(axsam.az)

Telegramda izləyin