TURAL İSMAYILOV: "G20 Zirvə görüşünə dəvət olunması ölkəmizin beynəlxalq münasibətlər sistemində artan çəkisinin göstəricisidir"

Xəbər verildiyi kimi, Azərbaycan 2026-cı il dekabrın 14-15-də ABŞ-n Mayami şəhərində keçiriləcək G20 Liderlər Sammitinə dəvət olunan ölkələr sırasındadır. Bu dəvət ölkəmizin beynəlxalq nüfuzunun və qlobal iqtisadi-siyasi gündəmdə rolunun artması baxımından faydalıdır.

Keçiriləcək Zirvə görüşü ilə bağlı Sonxeber.az-a açıqlama verən analitik Tural İsmayılov əhəmiyyətli məsələlərə toxunub:

"G20 qlobal iqtisadiyyatın əsas aktorlarının toplandığı platformadır və burada iştirak Azərbaycanın yalnız regional deyil, daha geniş geosiyasi və iqtisadi gündəmdə nəzərə alındığını göstərir. Xüsusilə ABŞ tərəfindən bu dəvətin irəli sürülməsi Bakı ilə Vaşinqton arasında münasibətlərin strateji məzmununun dərinləşdirilməsi baxımından mühüm siyasi mesajdır. Bu, ABŞ-ın Azərbaycanın enerji təhlükəsizliyi, nəqliyyat-logistika imkanları, regional sabitlik və Şərq-Qərb bağlantılarındakı rolunu diqqətdə saxladığını göstərir".

Ekspert vurğulayıb ki, Azərbaycan belə bir platformada ilk növbədə Orta Dəhlizin inkişafını, enerji təhlükəsizliyini, bərpaolunan enerji potensialını və yeni nəqliyyat-kommunikasiya layihələrini gündəmə gətirə bilər.

Həmsöhbətimiz onu da əlavə etdi ki, G20-də iştirak Azərbaycanın böyük şirkətlər üçün cəlbediciliyini artıra bilər:
"Bununla yanaşı, Azərbaycanın COP29 təcrübəsi, yaşıl enerji keçidi, rəqəmsal transformasiya və regional iqtisadi əməkdaşlıq imkanları da təqdim edilə bilər. G20 platforması ölkəyə yeni investorlarla birbaşa təmas qurmaq, iri maliyyə institutları və transmilli şirkətlərin diqqətini Azərbaycana yönəltmək baxımından əlavə imkanlar yaradır"
Politoloq son olaraq diqqətə çatdırdı ki, Azərbaycan özünün geoiqtisadi üstünlüklərini investisiya layihələrinə çevirməli və iqtisadi diplomatiyanı daha fəal şəkildə qurmalıdır:

"Burada əsas məsələ sadəcə dəvət olunmaq deyil, həmin platformadan konkret nəticələr əldə etməkdir. ABŞ-ın dəvəti isə Vaşinqtonun Azərbaycanı Cənubi Qafqazda və daha geniş Avrasiya məkanında əhəmiyyətli tərəfdaş kimi gördüyünü göstərən siyasi siqnaldır. Bu baxımdan G20-də iştirak Azərbaycanın beynəlxalq nüfuzunun möhkəmləndirilməsi ilə yanaşı, ABŞ-Azərbaycan münasibətlərində yeni əməkdaşlıq mərhələsinin formalaşmasına da zəmin yarada bilər".

Lalə Məmmədova

Telegramda izləyin