Qonşu davası qanlı bitdi

Türkiyənin Kayseri vilayətinin Yahyalı rayonunda keçmiş məhəllə muxtarı Selahattin Şahin silahlı hücum nəticəsində həyatını itirib.

Sonxeber.az xarici mediaya istinadla xəbər verir ki, hadisə səhər saatlarında Yahyalı rayonunun Kapuzbaşı məhəlləsində baş verib. Məlumata görə, 52 yaşlı keçmiş muxtar Selahattin Şahin evinin həyətində oturduğu zaman silahlı hücuma məruz qalıb.

İlkin məlumata əsasən, hücumu Şahinin aralarında əvvəldən ədavət olduğu bildirilən qonşusu M.A. törədib. Şübhəlinin pompalı tüfənglə Şahinə atəş açdığı qeyd olunur.

Silah səslərindən sonra hadisə yerinə jandarma və təcili tibbi yardım qrupları göndərilib. Ağır yaralanan Şahinə hadisə yerində ilkin tibbi yardım göstərildikdən sonra xəstəxanaya çatdırılıb.

Həkimlərin bütün müdaxilələrinə baxmayaraq, 52 yaşlı kişinin həyatını xilas etmək mümkün olmayıb.

Hadisədən sonra jandarma əməkdaşları cinayət şübhəlisinin saxlanılması üçün əməliyyat keçirib. Şübhəli M.A. saxlanılaraq istintaqa cəlb olunub.

Hadisə ilə bağlı araşdırma başladılıb. Cinayətin motivləri və tərəflər arasında əvvəlki ədavətin səbəbləri araşdırılır.

Telegramda izləyin