Gənclər niyə problemləri həll etmək yerinə ayrılmağı seçir? - AÇIQLAMA

Son illərdə gənclər arasında münasibətlərin daha qısa müddət davam etməsi və tərəflərin problemlə qarşılaşdıqda münasibəti davam etdirmək əvəzinə ayrılmağa üstünlük verməsi diqqət çəkir.

Bəzi hallarda münasibətlərin tez başlaması və eyni sürətlə bitməsi emosional bağların qurulmasına imkan vermir.

Bəs gənclərin münasibətlərdə daha səbirsiz olması və ayrılıq qərarını daha asan verməsi hansı psixoloji amillərlə bağlıdır?

Psixoloq Gülsər Qədirli bu barədə Sonxeber.az -a açıqlama verib:

"Gənclər arasında münasibətlərin daha qısa müddətli olmasının bir neçə psixoloji səbəbi ola bilər. Burada söhbət bütün gənclərin eyni davranışından getmir. Lakin müasir həyat tərzi, sosial medianın yaratdığı münasibət modeli, yüksək gözləntilər və emosional çətinliklərə dözümlülüyün azalması bu prosesə təsir edən amillər sırasındadır.

Əvvəla, sosial şəbəkələr insanlarda münasibətlərlə bağlı müəyyən ideal təsəvvür yaradır. İnsanlar internetdə əsasən münasibətlərin xoş və romantik tərəflərini görürlər. Bu isə real münasibətdə qarşıya çıxan fikir ayrılıqları, konfliktlər və çətinliklərin "normal proses" kimi qəbul edilməməsinə səbəb ola bilər. Nəticədə tərəflər münasibətdə problem yarananda bunun üzərində işləmək əvəzinə, "deməli, düzgün insan deyil" düşüncəsinə qapıla bilərlər.

Digər mühüm amil isə seçim imkanlarının çoxalması hissidir. Sosial media və tanışlıq platformaları insanlarda daim daha uyğun birinin mövcud olduğu təəssüratı yarada bilər. Bu zaman münasibətdə müəyyən çatışmazlıq yarananda insan onu düzəltmək əvəzinə daha yaxşı alternativ axtarmağa meyllənə bilər.

Bundan başqa, bəzi gənclər emosional yaxınlıqdan və məsuliyyətdən çəkinə bilirlər. Sağlam münasibət yalnız sevgi və romantikadan ibarət deyil; burada ünsiyyət qurmaq, qarşı tərəfi dinləmək, konfliktləri həll etmək və müəyyən güzəştlərə getmək də vacibdir. Bu bacarıqlar kifayət qədər formalaşmadıqda münasibəti davam etdirmək çətinləşir.
Burada fərdin əvvəlki ailə və münasibət təcrübəsi də rol oynaya bilər. Uşaqlıqdan sağlam ünsiyyət və konflikt həll etmə nümunələri görməyən insan sonrakı münasibətlərində problemlə qarşılaşdıqda qaçmağı və əlaqəni bitirməyi daha asan seçim kimi görə bilər.

Digər tərəfdən, hər ayrılığı münasibətə qarşı səbirsizlik kimi qiymətləndirmək də düzgün deyil. Bəzən münasibətin bitirilməsi insanın öz sərhədlərini qoruması və sağlam olmayan münasibətdən uzaqlaşması deməkdir. Əsas məsələ münasibətin nə qədər davam etməsi deyil, tərəflərin həmin münasibətdə özlərini necə hiss etməsi və problemləri necə həll etməsidir.

Sağlam münasibətin əsas göstəricilərindən biri də konfliktlərin ümumiyyətlə olmaması deyil, tərəflərin fikir ayrılıqlarını bir-birinə hörmət çərçivəsində həll edə bilməsidir. Gənclərin münasibətlərdə bunu öyrənməsi və emosional ünsiyyət bacarıqlarını inkişaf etdirməsi uzunmüddətli və daha sağlam münasibətlərin qurulmasına kömək edə bilər".

Telegramda izləyin