Səudiyyə Ərəbistanı səhrasında tapılan alətlər tarixi dəyişdi

Arxeoloqlar Səudiyyə Ərəbistanı səhrasında apardıqları araşdırmalar zamanı neandertalların izlərini aşkar edib və bu insan növünün hətta quraq şəraitdə belə yaşaya bildiyini sübuta yetirib.

Qaynarinfo xəbər verir ki, buz dövrünün insanı deyildikdə ilk olaraq adətən Avropanın soyuq mağaraları yada düşür. Lakin yeni elmi məlumatlar bu coğrafi sərhədlərin daha geniş olduğunu göstərir. "Quaternary Science Reviews" jurnalında dərc olunan araşdırma bəşəriyyətin qədim qohumları olan neandertalların quraq və sərt səhra şəraitində belə yaşaya bildiyini ortaya qoyub.

Tarix səhnəsindən silinmələrindən əvvəl Qərbi Asiya və Avropa boyunca geniş əraziyə yayılan neandertalların izləri indi daha cənubda da üzə çıxır. Arxeoloqlar Səudiyyə Ərəbistanında Nəfud səhrasının sərhədləri daxilində yerləşən Cubbah bölgəsindəki JKF-1 ərazisində mühüm kəşflər ediblər. Burada aşkarlanan daş alətlər bu növün yayılma arealının Ərəbistan yarımadasına qədər uzandığını göstərir.

Tədqiqatçılar birbaşa sümük və ya DNT qalıqları tapmaq əvəzinə Levallua texnikası ilə formalaşdırılmış daş qəlpələrini araşdırıblar. Bölgədən toplanan minlərlə materialın ölçüsü, xammalı və dövrün şərtləri mürəkkəb statistik modellərə daxil edilib. Kompüter əsaslı analizlər artefaktların Homo sapiens əvəzinə birbaşa neandertallar tərəfindən hazırlandığını 93 faiz dəqiqliklə göstərib.

Tətbiq olunan dəqiq tarixləndirmə üsulları ərazidəki alətlərin təxminən 55 min il əvvələ aid olduğunu təsdiqləyib. Bu tarix bölgənin daha yaşıllıq və rütubətli olduğu dövrlərə deyil, quraqlığın təsirini göstərdiyi bir zaman kəsiyinə təsadüf edir.

Əldə olunan nəticələr bu icmaların yalnız Avropa ilə məhdudlaşmadığını, Asiyanın geniş ərazilərinə yayılan böyük yaşayış arealına sahib olduğunu göstərir.

Telegramda izləyin