Azərbaycan-Qırğızıstan münasibətləri regional və beynəlxalq müstəvidə mühüm məzmun daşıyır

"Azərbaycan Prezidentinin Qırğızıstana son səfəri həm ikitərəfli münasibətlər, həm də Şanxay Əməkdaşlıq Təşkilatının gələcək perspektivləri baxımından əhəmiyyətlidir. Azərbaycan və Qırğızıstan ikitərəfli müstəvidə dost və yaxın ölkələr olmaqla yanaşı, müxtəlif beynəlxalq əməkdaşlıq platformalarında da birgə fəaliyyət göstərirlər".

Bunu Sonxeber.az-a açıqlamasında siyasi şərhçi Aydın Quliyev bildirib.

Ekspert bildirib ki, iki ölkə Mərkəzi Asiya dövlət başçılarının məşvərət görüşləri, Qoşulmama Hərəkatı, İslam Əməkdaşlıq Təşkilatı və Türk Dövlətləri Təşkilatı kimi müxtəlif formatlarda əməkdaşlıq edir:

"Bu baxımdan Azərbaycan-Qırğızıstan münasibətləri həm regional, həm də beynəlxalq müstəvidə mühüm məzmun daşıyır. Azərbaycan Prezidentinin səfərinin Şanxay Əməkdaşlıq Təşkilatının sammiti ilə əlaqəli olduğu gözlənilir. Bununla yanaşı, sammit çərçivəsində Azərbaycan-Qırğızıstan ikitərəfli münasibətlərinin inkişafı ilə bağlı məsələlərin də müzakirə olunacağı ehtimal edilir. Azərbaycan və Qırğızıstanın Mərkəzi Asiya və Qafqazda yerləşməsi, mövcud imkanlarını birləşdirməsi əməkdaşlığın daha geniş nəticələr verməsinə şərait yarada bilər".

Onun sözlərinə görə, iki ölkənin Çin-Azərbaycan-Avropa istiqamətində formalaşan Orta Dəhliz və onun ətrafındakı nəqliyyat marşrutları baxımından əlverişli coğrafi mövqeyə malik olması əməkdaşlığın əhəmiyyətini daha da artırır:

"Qarşıdakı dövrdə ticarət, investisiya, işğaldan azad edilmiş ərazilərin bərpasında birgə iştirak, investisiya fondlarının fəaliyyəti və turizm kimi sahələrdə əməkdaşlığın genişləndirilməsi üçün imkanlar mövcuddur. Qırğızıstan Mərkəzi Asiyanın türk dövlətlərindən biri kimi Azərbaycanın Türk Dövlətləri Təşkilatı çərçivəsində həyata keçirdiyi təşəbbüsləri dəstəkləyir. Azərbaycan-Qırğızıstan əməkdaşlığı həm türk birliyinin gələcəyi, həm Şanxay Əməkdaşlıq Təşkilatı çərçivəsində iki ölkənin imkanlarının daha səmərəli şəkildə ortaya qoyulması, həm də digər regional və beynəlxalq platformalarda qarşılıqlı fəaliyyət baxımından əhəmiyyət daşıyır".

Ekspert qeyd edib ki, bu baxımdan prezidentlərin görüşündə ikitərəfli münasibətlərin müxtəlif istiqamətləri üzrə mühüm məsələlərin müzakirə ediləcəyi və gələcək əməkdaşlığın yeni prioritetlərinin müəyyənləşdiriləcəyi gözlənilir.

Röyalə Xəyal

Telegramda izləyin