Ekspress avtobuslar sərnişin tələbatını tam qarşılaya bilir? - AÇIQLAMA

Məlum olduğu kimi, metro xətlərinin ayrılması ilə əlaqədar 6 yeni ekspress avtobus marşrutu istifadəyə verilib, eyni zamanda 20 müntəzəm marşrut üzrə avtobusların sayı artırılıb və intervallar azaldılıb.

Bəs, mövcud ekspress avtobuslar sərnişin tələbatını tam qarşılaya bilirmi və sıxlığın qarşısını almaq üçün əlavə avtobusların cəlb edilməsi və intervalların daha da azaldılması kimi tədbirlərə ehtiyac varmı?
Mövzu ilə bağlı Sonxeber.az-a açıqlama verən nəqliyyat eksperti Eldəniz Cəfərov bildirib ki, metronun daşıdığı sərnişin yükünü avtobuslar tam şəkildə qarşılaya bilməz.

"Hazırda müvafiq qurumlar əllərində olan resurslardan istifadə etməklə yaranmış problemi həll etməyə çalışırlar. Bu çərçivədə ekspres avtobuslar ideyası ortaya çıxıb və sərnişinlərin daşınmasında onlardan istifadə olunur. Hazırda ictimai nəqliyyatımız əsasən avtobus və metrodan ibarətdir. Avtobuslarda problem yarananda insanlar metroya, metroda problem olduqda isə avtobuslara yönəlirlər. Halbuki əvvəlki dövrlərdə tramvay və trolleybus kimi alternativ nəqliyyat vasitələri də mövcud idi. Əgər ictimai nəqliyyat vaxtında daha çox şaxələndirilsəydi, bu cür çətinliklərin qarşısını almaq daha asan olardı".

Ekspert bildirib ki, hazırda belə alternativlər yoxdur və sərnişin yükü əsasən iki nəqliyyat vasitəsinin üzərinə düşür:

"Mövcud resurs və imkanlardan istifadə etməklə yaranmış çətinliyi aradan qaldırmağa çalışmaq normaldır. Başqa alternativ yoxdursa, bu cür çıxış yollarından istifadə edilməlidir. Lakin sərnişin sıxlığının qarşısını almaq çətin olacaq. Çünki Bakıda həddindən artıq mərkəzləşmə var. Universitetlər, turizm obyektləri, müxtəlif tədbirlər, alış-veriş mərkəzləri və digər əsas məkanların böyük hissəsi Bakıda, xüsusilə də şəhər mərkəzində yerləşir. Ona görə də bu məsələ artıq yalnız nəqliyyatçıların problemi deyil. Bu, bütövlükdə şəhər infrastrukturunun problemidir".

Röyalə Xəyal

Telegramda izləyin