İctimai nəqliyyatda qət edilən məsafəyə görə ÖDƏNİŞ EDİLƏCƏK

Azərbaycanda ictimai nəqliyyatda "brutto müqavilə" sisteminin tətbiqinə başlanılıb. Yeni modeldə daşıyıcılara sərnişin sayına görə deyil, qət edilən məsafə və göstərilən xidmətin keyfiyyətinə əsasən ödəniş edilir. Marşrut üzrə avtobusların sayı, hərəkət intervalı və digər xidmət göstəriciləri əvvəlcədən müəyyənləşdirilir.

Bəs, bu sistem sərnişindaşımanın keyfiyyətinə və avtobusların hərəkət intervalına necə təsir göstərəcək, daşıyıcıların sərnişin sayından asılılığını azaltmaqla daha müntəzəm və keyfiyyətli xidmət göstərməsinə nə dərəcədə imkan verəcək?
Mövzu ilə bağlı Sonxeber.az-a açıqlama verən nəqliyyat eksperti Aslan Əsədov bildirib ki, "brutto müqavilə"də əsas məsələ gediş haqqının məsafəyə görə deyil, daşıyıcıya müəyyən edilmiş sabit məbləğin ödənilməsi prinsipinə əsaslanmasıdır.

"Bu sistemin əsas məqsədlərindən biri daşıyıcı şirkətlərin və sahibkarların xərclərinin daha əvvəlcədən müəyyənləşdirilməsinə və idarə olunmasına imkan yaratmaqdır. Bu modelin sərnişinlər üçün müəyyən mənfi tərəfləri də ola bilər. Çünki məsafəyə əsaslanan gediş haqqı sərnişin üçün daha aydın və rahat görünür: sərnişin getdiyi məsafəyə uyğun ödəniş edir. Brutto müqavilə sistemində isə daşıyıcının gəliri və xərcləri əvvəlcədən müəyyən edilmiş şərtlər əsasında formalaşır".

Ekspert bildirib ki, yaxın məsafələrə daşımaların düzgün tənzimlənməsi həm sərnişinlərin daha rahat nəqliyyatla təmin olunmasına, həm də daşıyıcıların xərclərinin optimallaşdırılmasına imkan verə bilər:

"Aidiyyəti qurumların yaxın məsafələr üzrə marşrutları və gedişləri daha çevik tənzimləməsi ictimai nəqliyyatda xidmət keyfiyyətinin yüksəldilməsinə şərait yarada bilər. Gediş haqqının müəyyənləşdirilməsində əsas məsələlərdən biri də məbləğin əvvəlcədən aydın və sabit olmasıdır. İstər yaxın, istərsə də uzaq məsafələr üzrə gediş haqqının konkret məbləğ çərçivəsində müəyyən edilməsi sərnişinlərə öz xərclərini əvvəlcədən planlaşdırmağa imkan verir. Bu baxımdan, tariflərin düzgün müəyyənləşdirilməsi ictimai nəqliyyatdan istifadənin səmərəliliyinə və sərnişinlərin xərclərinin idarə olunmasına təsir edən amillərdən biridir".

Röyalə Xəyal

Telegramda izləyin