Bu məktəblər DİSTANT TƏHSİLƏ keçir: Hansı tədbirlər görülməlidir?

Bəzi hallarda məktəblərin müvəqqəti olaraq distant təhsilə keçirilməsi zəruri ola bilər. Azərbaycanda da bu təcrübə müxtəlif səbəblərlə tətbiq edilib. Lakin distant təhsilin səmərəli olması üçün şagirdlərin texniki imkanları və dərslərdə fəal iştirakı nəzərə alınmalıdır.

Bəs, məktəblərin distant təhsilə keçirilməsi hansı hallarda zəruri hesab olunur və bu zaman şagirdlərin internet, texniki imkanlar və müəllimlərlə canlı ünsiyyət baxımından çətinlik yaşamaması üçün hansı tədbirlər görülməlidir?
Mövzu ilə bağlı Sonxeber.az-a açıqlama verən təhsil eksperti Elçin Əfəndi bildirib ki, distant təhsilə keçid yalnız xüsusi fors-major hallarda, fövqəladə vəziyyət, pandemiya və ya kütləvi tədbirlərin keçirildiyi dövrlərdə tətbiq oluna bilər:

"Azərbaycanda bununla bağlı artıq müəyyən təcrübə formalaşıb. Koronavirus pandemiyası zamanı dərslərin distant formada keçirilməsi ilə bağlı təcrübə əldə edildi. Bundan əlavə, paytaxtda kütləvi tədbirlərin keçirildiyi dövrlərdə, məsələn, "Formula 1" yarışları və COP29 zamanı bəzi məktəblərdə dərslər distant formada təşkil olunub. Belə hallarda distant təhsilin tətbiqi həm mövcud infrastruktur, həm də təhsilverən və təhsilalanların bu prosesdə iştirak təcrübəsi baxımından daha asan həyata keçirilir".

Ekspert bildirib ki, distant təhsilin keyfiyyətə təsirinə gəldikdə isə ənənəvi, əyani təhsilin daha üstün olduğu qeyd olunur:

"Bununla belə, müəyyən müddət ərzində, bir həftə, 10 gün və ya 20 gün müddətində xüsusi tədbirlərlə əlaqədar distant təhsilə keçid təhsil keyfiyyətinə ciddi təsir göstərməyə bilər. Pandemiya və ya fövqəladə vəziyyət kimi hallarda bu müddət 6 aydan 1 ilə qədər uzandıqda isə təhsilin keyfiyyətinə mənfi təsir daha çox hiss olunur. Distant təhsilə keçid zamanı şagirdlərin internetə çıxışı, texniki və texnoloji imkanları, eləcə də müəllimlərin bu prosesə hazırlığı nəzərə alınmalıdır. İnternet və elektrik enerjisi ilə təminatın yüksək səviyyədə olması vacibdir. Eyni zamanda, canlı ünsiyyətin olmaması distant təhsil zamanı müəyyən çətinliklər yarada bilər. Bu səbəbdən həm təhsilverənlər, həm də təhsilalanlar dərs prosesinin keyfiyyətli və səmərəli təşkilinə çalışmalıdırlar".

Röyalə Xəyal

Telegramda izləyin