Güclü küləyin ağır fəsadları: Hansı təhlükəsizlik tədbirləri görülməlidir?

Güclü külək zamanı binaların eyvanlarından beton və digər konstruksiya hissələrinin qoparaq aşağı düşməsi həm piyadalar, həm də ətrafda olan nəqliyyat vasitələri üçün ciddi təhlükə yarada bilər. Xüsusilə köhnə və baxımsız binalarda konstruksiyaların əvvəlcədən yoxlanılması və təhlükəli hissələrin vaxtında bərpası vacibdir. Tikinti qanunvericiliyində də obyektlərin təhlükəsiz istismarı və təbii təsirlərdən qorunması ilə bağlı tələblər müəyyən edilib.

Bəs, eyvanlardan beton parçalarının qoparaq aşağı düşməsinin qarşısını almaq üçün binalara hansı dövrlərdə və necə texniki baxış keçirilməlidir, təhlükəli vəziyyətdə olan eyvanlara kim nəzarət etməli və bina sakinləri belə hallarda hansı qurumlara müraciət etməlidirlər?
Mövzu ilə bağlı Sonxeber.az-a açıqlama verən təhlükəsizlik məsələləri üzrə ekspert Samir Nəbiyev bildirib ki, eyvanlardan beton parçalarının qopmasının qarşısını almaq üçün təhlükə vaxtında aşkar edilməli və onun səbəbi aradan qaldırılmalıdır.

"Belə halları yalnız küçə və ya yol amili ilə əlaqələndirmək düzgün deyil. Su sızması, armaturun paslanması, betonun köhnəlməsi və əlavə yüklər konstruksiyanı əvvəlcədən zəiflədə bilər. Bu səbəbdən eyvanlarda müntəzəm texniki baxış keçirilməli, çatlar, betonun laylanması, açıqda qalan armatur və su sızmaları yoxlanılmalıdır. Şübhəli hallarda ixtisaslaşmış mühəndislər tərəfindən ətraflı müayinə aparılmalıdır. Zədələnmiş hissələr mühəndisin texniki rəyinə uyğun şəkildə bərpa edilməli və su sızmasının qarşısı alınmalıdır. Sadəcə suvaq çəkilməsi və rənglənməsi konstruktiv təhlükəni aradan qaldırmır. Bu, mövcud problemin yalnız üzərini örtə və təhlükənin gizli şəkildə davam etməsinə səbəb ola bilər".

Ekspert bildirib ki, mövcud binaların eyvanlarının təhlükəsizliyinə nəzarət isə binanın idarəetmə formasından asılı olaraq həyata keçirilməlidir:

"Mənzil Məcəlləsinin 141 və 142-ci maddələrinə əsasən, binaların təhlükəsiz saxlanılması və təmirinin təşkili seçilmiş idarəetmə üsuluna uyğun həyata keçirilir. Bu məsuliyyət idarəedici təşkilat, mənzil mülkiyyətçilərinin müştərək cəmiyyəti və ya binanı bilavasitə idarə edən mülkiyyətçilər tərəfindən həyata keçirilə bilər. Bu baxımdan bütün binalar üzrə məsuliyyəti avtomatik olaraq yalnız mənzil istismar idarələrinin, yəni JEK-lərin və ya konkret eyvan sahibinin üzərinə qoymaq düzgün deyil. Yeni tikililərdə də idarəetmə funksiyalarını MTK-lar və ya mənzil mülkiyyətçilərinin müştərək cəmiyyətləri həyata keçirə bilər. "Azərbaycan Respublikasında mənzil fondunun özəlləşdirilməsi haqqında" Qanunun 13-cü maddəsində isə özəlləşdirilmiş mənzil fondunun texniki vəziyyətinə və vaxtında təmirinə nəzarətin yerli icra hakimiyyəti orqanlarına həvalə edildiyi qeyd olunur".

Onun sözlərinə görə, praktik olaraq, hər texniki baxışın nəticəsi aktlaşdırılmalı, aşkar edilmiş qüsurlar üzrə məsul şəxs və təmir müddəti müəyyənləşdirilməli, iş başa çatdıqdan sonra isə onun nəticəsi yoxlanılmalıdır:

"Eyvan və ya digər konstruksiyadan beton parçalarının qopması təhlükəsi varsa, insanların həmin əraziyə daxil olması məhdudlaşdırılmalı, ərazi baryerlənməli və eyvana giriş təhlükəsiz şəkildə məhdudlaşdırılmalıdır. Belə hallarda Fövqəladə Hallar Nazirliyinin 112 qaynar xəttinə məlumat vermək də vacibdir. Təhlükəsizliyin əsas məqsədi hadisədən sonra günahkar axtarmaq deyil, hadisə baş verməzdən əvvəl mövcud qüsuru aşkar edərək aradan qaldırmaq olmalıdır".

Röyalə Xəyal

Telegramda izləyin