Marketdəki uşaq yeməklərinə gizlicə zəhər yerləşdirdi, 5 körpə xəstəxanalıq oldu - VİDEO

İsrailin Qüds şəhərində körpələr üçün nəzərdə tutulan meyvə pürelərinə sakitləşdirici və anestezik təsirə malik maddələr yeritdiyi iddia olunan şəxs saxlanılıb.

Sonxeber.az xarici mediaya istinadla xəbər verir ki, İsrail polisi iyun ayında bəzi uşaqların zəhərlənmə əlamətləri ilə xəstəxanaya çatdırılmasından sonra araşdırmaya başlayıb. İstintaq çərçivəsində ölkənin cənubunda yaşayan 40 yaşlarında Yan Shemla adlı şübhəli saxlanılıb.

İstintaqın son nəticələrinə əsasən, şübhəlinin Qüdsdəki "Zol U'Begadol" supermarketlərinin filiallarına daxil olaraq körpələr üçün nəzərdə tutulan "Prinok" markalı meyvə püresi bankalarını rəflərdən götürdüyü, məhsullara dərman yeritdikdən sonra isə yenidən rəflərə qoyduğu ehtimal edilir.

Təxminən 10 saniyəlik təhlükəsizlik kamerası görüntülərində də bir şəxsin marketin rəflərinin yerləşdiyi hissədə hərəkət etdiyi, daha sonra əlində məhsulla uzaqlaşdığı görünür. Bununla belə, görüntülər məhsula hər hansı maddənin yeridildiyini təkbaşına təsdiqləmir.

Hadisə iyun ayında Qüds bölgəsində bir neçə uşağın halsızlıq, həddindən artıq yuxululuq və reaksiyasızlıq kimi əlamətlər göstərməsi ilə üzə çıxıb. Xəstəxanada aparılan müayinələr zamanı uşaqların qanında benzodiazepin qrupuna aid maddələr aşkarlanıb.

Bundan sonra uşaqların istehlak etdiyi "Prinok" markalı meyvə püreləri laboratoriyada yoxlanılıb. Aparılan testlər zamanı bəzi bankalarda klonazepam və lorazepam maddələri müəyyən edilib. Hər iki maddə sakitləşdirici təsir göstərən və reseptlə təyin olunan benzodiazepin qrupuna daxildir.

İsrail Səhiyyə Nazirliyinin açıqlamasına görə, iki ayrı hadisə nəticəsində ümumilikdə 5 uşaq xəstəxanaya yerləşdirilib. Uşaqların hamısının daha sonra evə buraxıldığı bildirilib.

Hadisədən sonra məhsulların satıldığı Qüdsdəki iki supermarket filialı müvəqqəti olaraq bağlanıb və çoxsaylı məhsul üzərində araşdırma aparılıb.

İstintaqın son mərhələsində polis şübhəlinin marketlərdəki hərəkətlərini əks etdirən təhlükəsizlik kamerası görüntülərini əldə edib. İsrail mətbuatında yayılan son məlumatlara görə, polis görüntülərin şübhəlinin məhsulları rəflərdən götürərək onlara müdaxilə etdikdən sonra geri qaytardığı ehtimalını gücləndirdiyini bildirir.

Şübhəli barəsində insanların həyatını təhlükəyə atacaq şəkildə zəhərləmək, oğurluq və dərmanlardan səhlənkar istifadə kimi ittihamlar üzrə araşdırma aparılır. Onun həbs müddəti istintaq çərçivəsində uzadılıb.

Telegramda izləyin