Estetik prosedur üçün klinikaya gedən 27 yaşlı influencer öldü

Finlandiyalı sosial media fenomeni Olivia Oras 27 yaşında həyatını itirib. Gənc influencerin Helsinkidəki özəl klinikada estetik prosedurdan əvvəl anesteziya aldığı zaman huşunu itirdiyi, daha sonra xəstəxanaya çatdırılsa da, həyatını xilas etməyin mümkün olmadığı bildirilib.

Sonxeber.az xarici mediaya istinadla xəbər verir ki, hadisə sentyabrın 3-də Helsinkidə yerləşən özəl klinikada baş verib. Estetik prosedurdan əvvəl anesteziya zamanı huşunu itirən Oras daha sonra Helsinki Universitet Xəstəxanasına aparılıb. Lakin 27 yaşlı influencer burada dünyasını dəyişib.

Hadisədən sonra Orasın ailəsi polisə müraciət edib. Helsinki Polisi sentyabrın 9-da hadisə ilə bağlı araşdırmaya başlanıldığını açıqlayıb. Hazırda istintaqın ilkin mərhələdə olduğu və hadisənin ağır səhlənkarlıq nəticəsində ölümə səbəb olma şübhəsi ilə araşdırıldığı bildirilib. Polis hələlik əlavə təfərrüat açıqlamayıb.

Olivia Oras sosial media hesabını 14 yaşında açaraq Finlandiyada tanınmağa başlayıb. O, 2016-cı ildə həyatından və sosial media ilə münasibətindən bəhs edən "The Perfect Selfie" adlı sənədli filmdə də yer alıb.

Sənədli filmdən sonra yaşadığı narahatlıqlar səbəbilə sosial media hesablarını bağlayan Oras 2017-ci ildə Amsterdam şəhərinə köçüb. Daha sonra Helsinkiyə qayıdan influencer həyatının çətin dövrlərindən birində asılılıqla bağlı müalicə də alıb.

Oras son illərdə sosial media fəaliyyətindən əlavə, ictimai və sosial layihələrə də diqqət yetirib. Atasına ağciyər fibrozisi diaqnozu qoyulmasından sonra ağciyər xəstəlikləri üzrə tədqiqatları dəstəkləmək məqsədilə Respiratus Ry adlı qeyri-kommersiya təşkilatı yaradıb. O, həmçinin texnologiya və sağlamlıq sektorunda fəaliyyət göstərən müxtəlif təşəbbüslərdə rəhbər vəzifələr tutub.

Telegramda izləyin