Belə səfərlər Azərbaycanın ərazi bütövlüyünün dəstəklənməsinə töhfə verir - AÇIQLAMA

"Azərbaycanın Qarabağ bölgəsinə, xüsusilə Xankəndi, Şuşa, Laçın, Kəlbəcər və digər ərazilərə səfərlərin mümkün olması və Azərbaycanda fəaliyyət göstərən diplomatik korpus nümayəndələrinin bu ərazilərə səfər etməsi iki mühüm məna daşıyır".

Bunu Sonxeber.az-a açıqlamasında politoloq Samir Hümbətov deyib.

O, bildirib ki, birincisi, hansı ölkələrin səfirlik nümayəndələrinin həmin ərazilərə səfər etməsi özü müəyyən mesajdır:

"Diplomatik nümayəndələrin öz ölkələrindən razılıq almadan belə səfərlər etməsi mümkün deyil. Bu baxımdan, onların Qarabağ bölgəsinə səfəri Azərbaycanın ərazi bütövlüyünün və suverenliyinin tanınması, eləcə də Azərbaycanın ərazi bütövlüyünə hörmətin göstəricisi kimi qiymətləndirilə bilər.
İkinci məsələ isə bəzi ölkələrin Azərbaycanın Xankəndi, Xocalı, Xocavənd, Şuşa və digər ərazilərinə qarşı əvvəlki qərəzli mövqelərə münasibət olaraq yeni mövqe nümayiş etdirməsidir. Bu səfərlər Azərbaycanın ərazi bütövlüyünün tanınması və ölkəyə dəstəyin ifadəsi baxımından əhəmiyyət daşıyır. Eyni zamanda, bu, Azərbaycan dövlətinin belə məsələlərdə təşəbbüskar mövqe nümayiş etdirdiyini göstərən addımlardan biri kimi qiymətləndirilə bilər".

Ekspert bildirib ki, bu, müsbət haldır və belə səfərlərin həyata keçirilməsi beynəlxalq miqyasda Azərbaycanın ərazi bütövlüyünün dəstəklənməsinə töhfə verir:

"İstər hər hansı müəssisənin açılışında, istərsə də digər tədbirlərdə diplomatik nümayəndələrin iştirakı mahiyyət etibarilə Azərbaycanın dövlət maraqlarına xidmət edən addım kimi qiymətləndirilə bilər".

Röyalə Xəyal

Telegramda izləyin