Park Bulvar"da yanğın təhlükəsi yaradan görüntülər: "Çağ Baku" restoranında nə baş verir?

Səbail rayonu, Neftçilər prospekti 42 ünvanında, Dənizkənarı Milli Park ərazisinə yaxın yerləşən "Park Bulvar"da fəaliyyət göstərən "Çağ Baku" restoranı ilə bağlı "Real Azərbaycan"a narahatedici məlumat daxil olub.

Mənbənin iddiasına görə, restoranda gənclərin əyləncəsi zamanı qapalı məkanda fişənglərdən istifadə olunur. Əldə olunan video kadrlarda da əyləncə zamanı yandırılan fişənglərin ətrafa qığılcım saçdığı görünür.

Sözügedən görüntülər isə şəhərin mərkəzində, insanların sıx olduğu və böyük sərmayə hesabına inşa edilmiş "Park Bulvar" kimi məkanda təhlükəsizliklə bağlı ciddi suallar yaradır.

Mənbənin sözlərinə görə, bu halın hər gün təkrarlanması da iddia olunur. Əgər bu məlumat doğrudursa, qapalı məkanda pirotexniki vasitələrdən istifadə olunmasına hansı əsasla icazə verildiyi və bununla bağlı aidiyyəti qurumlardan rəsmi razılığın olub-olmaması sual doğurur.

"Real Azərbaycan" olaraq aidiyyəti qurumların məsələyə aydınlıq gətirməsini gözləyirik: "Çağ Baku" restoranında qapalı məkanda fişənglərdən istifadəyə icazə verilibmi və obyektin yanğın təhlükəsizliyi baxımından yoxlanışı aparılıbmı?

https://www.instagram.com/reel/DdJ4UdMgctL/?stkn=YXJxaXlsYmthbWVi

Telegramda izləyin