Diplomatik korpus nümayəndələrinin Qarabağ və Şərqi Zəngəzura səfəri başa çatıb - FOTO

Azərbaycanda akkreditə olunmuş diplomatik korpus nümayəndələrinin Qarabağ və Şərqi Zəngəzura iki günlük səfəri başa çatıb.

Sonxeber.az "Report"a istinadən bildirir ki, diplomatlar səfərin ikinci günündə Ağdərə rayonunun Vəngli kəndi yaxınlığında yerləşən Gəncəsər Monastır Kompleksini, daha sonra isə Kəlbəcər rayonunun Vəng kəndindəki Xudavəng Monastır Kompleksini ziyarət ediblər.

Diplomatik korpusların nümayəndələrinə monastır komplekslərinin tarixi və memarlıq xüsusiyyətləri, eləcə də abidələrə müdaxilə, dəyişdirmə və saxtalaşdırma halları barədə məlumat verilib. Sonra qonaqlar kompleksləri gəziblər.

Diplomatlar və hərbi attaşelər səfər çərçivəsində "İstisu" mineral su zavodunun fəaliyyəti ilə də tanış olublar.

Daha sonra diplomatik korpusların nümayəndələri Kəlbəcərdə keçirilən Bal Festivalında iştirak ediblər.

Qeyd edək ki, bu, xarici diplomatların Azərbaycanın azad edilmiş ərazilərinə 22-ci səfəri idi.

Diplomatların müntəzəm səfərləri onlara Qarabağda və Şərqi Zəngəzurda aparılan tikinti-bərpa işlərinin nəticələri, regionun sosial-iqtisadi inkişafı, həmçinin tarixi və mədəni irsin qorunması işləri ilə yerində tanış olmağa imkan verir.

17:00

Azərbaycanda akkreditə olunmuş diplomatik korpusun nümayəndələri Kəlbəcərdəki "İstisu" mineral su zavoduna baş çəkiblər.

Sonxeber.az "Report"a istinadən verdiyi xəbərə görə, diplomatlar müəssisənin fəaliyyəti, istehsal gücü və mineral suyun qablaşdırılması prosesi ilə tanış olublar.

Qonaqlara zavod və "İstisu" mineral su mənbələri haqqında məlumat verilib.

16:23

Azərbaycanda akkreditə olunmuş xarici diplomatik korpusun nümayəndələri Kəlbəcər rayonunda yerləşən Xudavəng monastır kompleksində olublar.

Oxu.Az xəbər verir ki, 1993- 2020-ci illərdə ermənilərin təcavüzünə məruz qalan memarlıq abidələrindən biri də Kəlbəcər rayonundakı Xudavəng məbədidir. İşğal dövründə monastırda "bərpa" adı altında qanunsuz işlər görülüb. Arzu xatun, Böyük Həsən kilsələri və kompleksə daxil olan digər tikililər üzərində saxtalaşdırma əlamətləri olan əlavələr edib, abidələrin bir çox hissələrini vandalizmə məruz qoyublar.

Qeyd edək ki, bu kompleks regionda ən böyük monastır kompleksi hesab olunur.

Bu abidə Azərbaycan Respublikası Nazirlər Kabinetinin 2 avqust 2001-ci il tarixli 132 saylı Qərarı ilə təsdiq edilmiş "Dünya əhəmiyyətli daşınmaz tarix və mədəniyyət abidələri"nin siyahısına daxil edilib.

11:48

Azərbaycanda akkreditə olunmuş xarici diplomatik korpusun nümayəndələri Qarabağ və Şərqi Zəngəzura səfər çərçivəsində Ağdərə rayonunun Vəng kəndinə gəlib və Gəncəsər monastır kompleksini ziyarət ediblər.

Oxu.Az xəbər verir ki, Gəncəsər monastır kompleksi - erməni vandalizminin qurbanı olan abidələrimizdən biridir. Bu kompleksin əsas tikililəri XIII əsrdə inşa edilib. Monastırın yerləşdiyi Xaçınçay sahilindəki təpə hələ xristianlıqdan öncə müqəddəs yer sayılıb. Gəncəsər monastırı Qafqaz Albaniyasının dini və mədəni mərkəzi olub.

Gəncəsər monastırı işğal dövründə ermənilər tərəfindən saxtakarlığa və qanunsuz müdaxilələrə məruz qalaraq tarixi alban memarlıq üslubu dəyişdirilib.

Ermənilər 2012-ci ildə bu abidənin divarlarının üzərini mərmər daşlarla bağlamağa başlayıblar. Kompleksin həyətində aparılan tikinti "abadlıq" işləri monastırın əzəli görkəminə zərər vurub.

Xatırladaq ki, bu gün Azərbaycanda akkreditə olunmuş xarici diplomatik korpusun nümayəndələrinin Qarabağ və Şərqi Zəngəzura səfərinin ikinci günü başlayıb.

Səfərdə 58 ölkə və 9 beynəlxalq təşkilatı təmsil edən 150 nəfər iştirak edir.

10:36

Azərbaycanda akkreditə olunmuş xarici diplomatik korpus nümayəndələrinin Qarabağ və Şərqi Zəngəzura səfərinin ikinci günü başlayıb.

Oxu.Az-ın "Report"a istinadən verdiyi məlumata görə, səfərdə 58 ölkəni və 9 beynəlxalq təşkilatı təmsil edən 150 nəfər iştirak edir.

Səfər Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyevin müşayiəti ilə həyata keçirilir.

Səfər çərçivəsində diplomatik korpusun nümayəndələri Prezident İlham Əliyevin rəhbərliyi altında Ağdərə və Kəlbəcər rayonlarında reallaşdırılan genişmiqyaslı bərpa və quruculuq layihələri ilə tanış olacaqlar.

Diplomatlara regionda həyata keçirilən sosial və iqtisadi infrastruktur layihələri, tarixi-mədəni irs obyektlərinin vəziyyəti, eləcə də onların qorunması və bərpası istiqamətində görülən işlər təqdim olunacaq.

Qeyd edək ki, bu, diplomatik korpusun nümayəndələrinin 2020-ci ildən bəri Azərbaycanın işğaldan azad edilmiş ərazilərinə 22-ci səfəridir.

10:20

Diplomatik korpusun nümayəndələri Qarabağ və Şərqi Zəngəzura səfər çərçivəsində bu gün Ağdərə və Kəlbəcərdə olacaqlar.

Oxu.Az xəbər verir ki, bu barədə Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev özünün "X" sosial media hesabında paylaşdığı videonun üzərində yazıb.

"Diplomatik korpus nümayəndələri ilə Şuşa və Xankəndiyə səfərimizin ilk günündən. Hazırda Ağdərə və Kəlbəcərə yollanırıq", - deyə paylaşımda qeyd olunub.

Qeyd edək ki, sentyabrın 11-də Hikmət Hacıyevin müşayiəti ilə Azərbaycanda akkreditə olunmuş diplomatik korpusun nümayəndələrinin Qarabağ və Şərqi Zəngəzura ikigünlük səfəri başlayıb.

Telegramda izləyin