II Ramzesin 6,7 metrlik heykəlinin çatışmayan hissəsi 94 ildən sonra tapıldı

Təxminən bir əsr ayrı vəziyyətdə qalan firon II Ramzesin heykəli yenidən birləşdirilərək Misirdə əvvəlki yerində quraşdırılıb.

Qaynarinfo xəbər verir ki, bu barədə "Daily Galaxy" yazıb.

Məlumata görə, heykəlin aşağı hissəsi 1930-cu ildə, yuxarı hissəsi isə yalnız 2024-cü ildə tapılıb. Təxminən 6,7 metr hündürlüyündə və 40 tondan çox çəkisi olan nəhəng heykəl ilk dəfə 3200 ildən əvvəl ucaldıldığı Orta Misirdəki Hermopolis Magna məbədinin şimal girişini yenidən qoruyur.

Nəşr xatırladıb ki, 1930-cu ildə alman arxeoloq Günter Röder Misirin müasir Əl-Aşmuneyn şəhəri yaxınlığında heykəlin aşağı hissəsini aşkar edib. Qədim dövrdə bu ərazi Xemnu kimi tanınırdı və Qədim Padşahlığın əyalət mərkəzi olub.

Onilliklər ərzində heykəlin yuxarı hissəsinin itkin olduğu düşünülüb. Bu, qədim şəhərin ətrafındakı səhra qumlarının altında basdırıldığı güman edilən çoxsaylı xəzinələrdən biri sayılırdı.

Nəşrin məlumatına görə, bərpa edilən heykəl Orta Misirdə tam şəkildə qorunmuş ilk nəhəng heykəl, həmçinin müasir arxeoloji üsullarla tədqiq edilmiş ilk belə abidədir.

Heykəlin sonuncu fraqmenti 2024-cü ilin martında Misir-Amerika birgə ekspedisiyasının tapıntı barədə açıqlama verməsindən bir neçə həftə əvvəl torpaqda üzüaşağı vəziyyətdə aşkarlanıb. Misirin Turizm və Qədim Əsərlər Nazirliyinin mütəxəssisləri tapılan fraqmenti təxminən 3,8 metr hündürlüyündə insan fiquru kimi təsvir ediblər.

Arxeoloqlar Hermopolis Magnanın qədim xəzinələrinin əhəmiyyətli hissəsinin hələ də torpağın altında qaldığını bilirdilər. Lakin heykəlin sonuncu fraqmentinin dəqiq yeri ekspedisiya üçün gözlənilməz olub.

Ekspedisiyanın həmsədri, Kolorado Universitetinin Boulder şəhərindəki klassik filologiya kafedrasının dosenti İvona Trnka-Amreynin sözlərinə görə, komanda belə bir tapıntının mümkün olduğunu bilsə də, həmin vaxt aktiv axtarış aparmırdı.

Nil çayının yaxınlığında qazıntı aparılması daşın qorunması üçün real risk yaradırdı. Trnka-Amreyn press-relizdə bildirib ki, ərazinin çayın yaxınlığında yerləşməsi qrunt sularının səviyyəsi ilə bağlı daim problemlər yaradırdı.

Sonrakı qazıntılar fraqmentin təəccüblü dərəcədə yaxşı qorunduğunu təsdiqləyib. Tədqiqatçılar onun səthində hələ də qalmış mavi və sarı piqment izləri də aşkarlayıblar.

Bu cür piqmentlərin qorunub saxlanması nadir hal hesab olunur və gələcəkdə alimlərə heykəlin ilkin rənglərini, eləcə də onun hazırlanma şəraitini daha yaxşı anlamağa kömək edə bilər.

Telegramda izləyin