NYT: Alimlər süni intellektlə bağlı narahatlıqları "həddindən artıq şişirdilmiş" hesab edirlər

Dünyanın bir sıra alimləri hesab edirlər ki, süni intellekt texnologiyasının gələcəkdə bəşəriyyəti məhv edəcəyi ilə bağlı narahatlıqlar "həddindən artıq şişirdilib".

"Report" xəbər verir ki, bu barədə "The New York Times" (NYT) qəzeti yazıb.

Nəşr qeyd edib ki, texnologiya şirkətlərinin rəhbərləri və süni intellekt sistemlərini hazırlayan tədqiqatçılar arasında həmişə bu texnologiyanın bəşəriyyəti məhv etmək potensialı barədə xəbərdarlıq edən bir qrup mövcud olub.

"Dünyanın bir çox aparıcı tədqiqatçıları bu fikirlə razılaşmırlar. Onlar iddia edirlər ki, narahatlıqlar həddindən artıq şişirdilib", - materialda bildirilib.

Məqalə müəllifləri qeyd ediblər ki, süni intellektin inkişafı ilə bağlı potensial risklər həqiqətən də narahatlıq doğura bilər. Lakin onlar vurğulayıblar ki, bəşəriyyət onsuz da onun mövcudluğuna təsir göstərə biləcək bir çox qlobal təhdidlərlə üzləşir. Onların arasında iri asteroidlərin düşməsi, yeni pandemiyalar, termonüvə münaqişəsi, iqlim dəyişikliyi, günəş aktivliyinin püskürmələri, ekoloji fəlakətlər və yeni buzlaşma dövrünün başlama ehtimalı var.

Telegramda izləyin