Qarabağa səfərlərin təşkili mühüm əhəmiyyət daşıyır - AÇIQLAMA

"Diplomatik korpus nümayəndələrinin Qarabağa səfəri Qarabağda əldə olunmuş Zəfərdən sonra görülən işlərin beynəlxalq ictimaiyyətə və dünyaya təqdim olunması baxımından böyük əhəmiyyət daşıyır. Çünki səfər edən şəxslər - səfirlər, diplomatik korpus nümayəndələri və beynəlxalq təşkilatların təmsilçiləri bölgədə gördükləri və qarşılaşdıqları məsələlərlə bağlı öz ölkələrinə məlumat və hesabat təqdim edirlər".

Bunu Sonxeber.az-a açıqlamasında "Müasir İnkişaf" İctimai Birliyinin sədri, Crossmedia.az saytının baş redaktoru, siyasi şərhçi Mübariz Göyüşlü bildirib.

O, bildirib ki, bu baxımdan, belə səfərlərin təşkili mühüm əhəmiyyət daşıyır:

"Hesab edirəm ki, bu, artıq 22-ci səfər olmalıdır. Bu sayda səfərin təşkil olunması Qarabağda həyata keçirilən genişmiqyaslı işlərin həm ictimaiyyətə, həm də beynəlxalq ictimaiyyətə çatdırılması baxımından önəmlidir. Müharibədən sonra da erməni tərəfi Qarabağ məsələsini problemli məsələ kimi təqdim etməyə çalışırdı. Müxtəlif çıxışlarda məsələnin bitmədiyi və bölgəyə qayıtmaqla bağlı iddialar səsləndirilirdi. Beynəlxalq nümayəndələrin və diplomatların Qarabağa səfərlərinin təşkili isə bu baxımdan müəyyən mesaj verir. Bu səfərlər Qarabağın Azərbaycanın ayrılmaz tərkib hissəsi olduğunu və burada genişmiqyaslı quruculuq işlərinin aparıldığını nümayiş etdirir".

Onun sözlərinə görə, Xankəndi və Şuşa bu baxımdan xüsusi əhəmiyyət daşıyan məkanlardır:

"Diplomatik nümayəndələrin həmin ərazilərə səfərləri həm bölgədəki reallıqların beynəlxalq ictimaiyyətə çatdırılması, həm də Azərbaycanın mövqeyinin nümayiş etdirilməsi baxımından mühüm mesaj kimi qiymətləndirilə bilər".

Röyalə Xəyal

Telegramda izləyin