Tələbələrə ŞAD XƏBƏR: Təhsil krediti ilə bağlı yeni meyarlar formalaşır - Deputatdan AÇIQLAMA

Təhsil kreditlərindən yararlanmaq istəyən tələbələr üçün sosial meyarların necə müəyyənləşdirilməsi mühüm məsələlərdən biridir. Xüsusilə ailənin rəsmi gəliri ilə real maddi vəziyyəti arasında fərq olduğu hallarda yalnız sənədlərdə göstərilən gəlirin əsas götürülməsi bəzi tələbələrin bu imkanlardan kənarda qalmasına səbəb ola bilər. Bu baxımdan sosial meyarların daha obyektiv müəyyənləşdirilməsi və ailələrin faktiki maddi imkanlarının nəzərə alınması məsələsi müzakirə olunur.

Bəs, təhsil kreditləri üzrə sosial meyarlar müəyyən edilərkən ailənin yalnız rəsmi gəlirinin deyil, real maddi vəziyyətinin də nəzərə alınması tələbələrin bu imkanlardan yararlanmasına necə təsir göstərə bilər və bu meyarların daha ədalətli müəyyənləşdirilməsi üçün hansı yanaşma tətbiq olunmalıdır?

Mövzu ilə bağlı Sonxeber.az-a açıqlama verən Milli Məclisin deputatı Ceyhun Məmmədov bildirib ki, bu məsələ son günlər parlamentdə də geniş müzakirə olunub və bəzi deputatlar mövzu ilə bağlı öz mövqelərini bildiriblər.

"Hesab edirəm ki, bu, vacib məsələdir. Meyarlar müəyyən edilərkən real gəlirlərin nəzərə alınması məsələsi var. Mən də hesab edirəm ki, yalnız rəsmi gəlir deyil, şəxsin real maddi vəziyyəti də nəzərə alınmalıdır. Nəzərə almalıyıq ki, bu kreditlər dövlətimizin öz vətəndaşlarına göstərdiyi diqqət və qayğının göstəricisidir. Bu, çox vacib və önəmli məsələdir. Həmin qayğının insanlar tərəfindən daha yaxşı hiss olunması üçün əlavə addımların atılmasına ehtiyac var".

Deputat bildirib ki, bu məqamları nəzərə alaraq, bu istiqamətdə əlavə addımların atılmasını nəzərdən keçirməli və prosesə töhfə verməliyik:

"Çünki bu, vətəndaşlarımız üçün bir imkan və şansdır. Həmin imkanlardan daha çox insanın yararlanması üçün bu məsələlərin daha əlçatan olması və daha yaxşı həll olunması istiqamətində addımlar atılmalıdır".

Röyalə Xəyal

Telegramda izləyin