"Ramiz Mehdiyev işi"ndə yeni adlar: Şahid qismində kimlər dindirilib?

Prezident Administrasiyasının sabiq rəhbəri Ramiz Mehdiyevin cinayət işinin istintaqı zamanı şahid qismində dindirilən şəxslərin kimliyi məlum olub.

Sonxeber.az Gününsesi.info-ya istinadla xəbər verir ki, ötən gün Ramiz Mehdiyev və onun keçmiş köməkçisi Eldar Əmirovun cinayət işinin məhkəməyə göndərilməsi barədə məlumat verilmişdi.

Belə ki, Ramiz Mehdiyevin Prezident Administrasiyasına rəhbərlik etdiyi dövrdə Prezident katibliyinin rəisi olmuş, politoloq Eldar Namazov, Azərbaycan Demokrat Partiyasının sədri Sərdar Cəlaloğlu və "Bakı Steel Company" zavodunun sahibi Rasim Məmmədov istintaq çərçivəsində şahid qismində dindiriliblər.

Məlumata görə, həmin şəxslərin məhkəmə prosesində də şahid qismində ifadə verməsi gözlənilir.

Bu işlə bağlı daha bir diqqətçəkən məqam isə "Ramiz Mehdiyev işi" çərçivəsində həbs edilən AXCP sədri Əli Kərimli ilə bağlıdır.

Belə ki, Əli Kərimlinin cinayət işi sabiq PA rəhbərinin işindən ayrılsa da, lakin onun adı Mehdiyevin ittiham aktında şahid qismində keçir.

İstintaqa ifadə verməkdən imtina edən Əli Kərimlinin R.Mehdiyevin mühakiməsi zamanı dindirilib-dindirilməməsinə isə məhkəmə qərar verəcək.

Telegramda izləyin