İran və Rusiya tərəfindən Azərbaycan tarixi ilə bağlı təhriflərə yol verilir - ŞƏRH

"Azərbaycanın gerçək tarixi dünyaya tanıdılmalıdır. Uzun illər torpaqlarımız işğal altında olub və Ermənistan, eləcə də onun havadarları Azərbaycan tarixini saxta şəkildə dünyaya təqdim ediblər. Təəssüf ki, bu saxtakarlıqlar Azərbaycanla bağlı yanlış mövqe formalaşdırılmasına da xidmət edib".

Bunu Sonxeber.az-a açıqlamasında siyasi şərhçi Azər Həsrət deyib.

O, bildirib ki, artıq torpaqlarımız azad edilib və Azərbaycanın imkanları da kifayət qədər genişdir:

"Diplomatların azad edilmiş ərazilərə aparılması, burada görülən işlərlə tanış edilməsi və ümumiyyətlə tariximizin dünyaya tanıdılması istiqamətində daha böyük addımlar atılır və atılmalıdır. Bu, Ermənistanın və ermənilərin yanlış tarix təbliğatının qarşısının alınması baxımından vacibdir. Biz tarixdə baş verənləri dəyişdirmək, gizlətmək və ya yanlış təqdim etmək niyyətində deyilik. Azərbaycanın mövqeyi tarixin olduğu kimi, gerçək şəkildə dünyaya tanıdılmasıdır. Çünki tarix tarixdir və onu dəyişmək mümkün deyil. Nə baş veribsə, onu olduğu kimi təqdim etmək kifayətdir. Azərbaycan elə bir coğrafiyada yerləşir ki, burada min illər boyu mövcud olmuşuq və saxta tarix yaradaraq dünyaya təqdim etməyə ehtiyacımız yoxdur".

Ekspert bildirib ki, Azərbaycan tarixinin saxtalaşdırılması məsələsində yalnız Ermənistanın fəaliyyətindən danışmaq da kifayət deyil:

"Hesab edirəm ki, İran və Rusiya tərəfindən də Azərbaycan tarixi ilə bağlı təhriflərə yol verilir. Təəssüf ki, bu dövlətlər Azərbaycan ərazisindəki etnik azlıqlardan da bu məqsədlər üçün istifadə etməyə çalışırlar. Sevindirici haldır ki, azlıqların nümayəndələrinin böyük əksəriyyəti bu cür təxribatlarda iştirak etmir. Lakin ayrı-ayrı şəxslər Rusiyanın və İranın, fikrimcə, bu cür niyyətlərinə xidmət edirlər. Bir vaxtlar ermənilərin də Rusiya, İran və digər mərkəzlərin müəyyən məqsədlərinə xidmət edərək Azərbaycan torpaqlarının işğalında və ölkəmizə qarşı problemlərin yaradılmasında rol oynadığını görmüşük. Bu gün də başqa etnik azlıqlarla bağlı müəyyən işlərin aparıldığını müşahidə edirik. Ona görə də Azərbaycanın gerçək tarixini dünyaya tanıtmaqla yanaşı, ölkə daxilində də bu istiqamətdə maarifləndirici işlər aparılmalıdır. Çünki Azərbaycan tarixi şəxsiyyətləri və qəhrəmanları ilə bağlı müxtəlif iddialar irəli sürülür. Məsələn, Koroğlu və Babəklə bağlı müxtəlif fikirlər səsləndirilir, onların fərqli etnik kimliklərə aid olduğu iddia olunur. Bütün bunların qarşısını almaq üçün həm ölkə daxilində, həm də beynəlxalq səviyyədə Azərbaycanın tarixinin olduğu kimi təqdim olunması istiqamətində gərəkli işlər görülməlidir".

Röyalə Xəyal

Telegramda izləyin