Uşaqlıqdan tanış olan iki qadın illər sonra bacı olduqlarını öyrəndi

Hindistanın Mumbay şəhərindəki iki fərqli uşaq evindən 1980-ci illərin əvvəllərində övladlığa götürülən Meena Geltink və Minal Tijssen illər sonra Hollandiyada bir-birlərinin doğma bacısı olduqlarını öyrəniblər.

Sonxeber.az xarici mediaya istinadla xəbər verir ki, hazırda 43 və 44 yaşlarında olan qadınlar yeniyetməlik dövründə övladlığa götürmə agentliyinin təşkil etdiyi tədbirdə tanış olublar. Görüş zamanı onların bir-birinə çox bənzədiyini görən ətrafdakılar təəccüblənib. Bundan sonra illərlə məktublaşan Meena və Minal bir-birlərinə "bacım" deyə müraciət ediblər.

Təxminən 15 il əlaqələri kəsilən qadınlar daha sonra DNA testi etdiriblər. Test nəticəsində onların 100 faiz uyğunluqla doğma bacı olduqları müəyyənləşib.

Nəticəni aldıqdan sonra Meena böyük təəccüb və sevinc yaşadığını bildirib. Minal isə illər əvvəl tanış olduğu qadının əslində bacısı olduğunu əvvəlcə anlamadığını, sonradan sosial şəbəkədəki fotolardan həqiqəti dərk etdiyini deyib.

Bacıların ilk görüşü avqust ayında parkda baş tutub. Görüş zamanı göz yaşları, qucaqlaşmalar və gülüşlər yaşanıb. May ayından etibarən hər gün əlaqə saxlayan bacılar ailələri ilə də tanış olublar.

İndi onların ortaq arzusu illər əvvəl ayrıldıqları Hindistana birlikdə gedərək Mumbay küçələrində gəzməkdir.

Telegramda izləyin