Zəlzələ zamanı jurnalistlərin işi tərk etməməsi təqdir edildi - VİDEO

Türkiyənin Şanlıurfa şəhərinin Karaköprü rayonunda 5,4 bal gücündə zəlzələ baş verib.

Sonxeber.az xarici mediaya istinadla xəbər verir ki, zəlzələnin ocağı təxminən 7,4 kilometr dərinlikdə yerləşib. Təkanları hiss edən bəzi sakinlər təhlükəsizlik məqsədilə ev və iş yerlərindən çıxaraq açıq ərazilərə üz tutublar.

Zəlzələ anı şəhərdəki təhlükəsizlik kameralarına da düşüb. Xüsusilə yerli Urfanatik qəzetinin ofisində çəkilən görüntülər diqqət çəkib. Kadrlarda zəlzələ başlayan kimi ofisdəki jurnalistlərin panikaya düşərək otağı tərk etdikləri görünür.

Təkanların dayanmasından qısa müddət sonra isə jurnalistlər yenidən qaçaraq kompüterlərinin arxasına keçiblər. Onların zəlzələ ilə bağlı xəbərləri ictimaiyyətə çatdırmaq üçün fəaliyyətlərini davam etdirdikləri anlar təhlükəsizlik kamerası tərəfindən saniyə-saniyə qeydə alınıb. Yayılan görüntü sosial mediada viral olub.

İlkin məlumatlara görə, zəlzələ nəticəsində ciddi xəsarət və dağıntı barədə məlumat verilməyib.

Telegramda izləyin