Bu metro stansiyalarına giriş PULSUZ oldu: Sərnişin sıxlığı AZALDI

Bakıda sərnişin axınının daha səmərəli bölüşdürülməsi və şəhərin giriş istiqamətlərində nəqliyyat sıxlığının azaldılması məqsədilə "Avtovağzal" və "Xocəsən" metro stansiyalarına giriş müvəqqəti olaraq ödənişsiz edilib. Bu addım xüsusilə Sumqayıt, Xırdalan və Bakı-Şamaxı yolu istiqamətindən gələn sərnişinlərin "20 Yanvar" və "Şamaxinka" ərazilərinə daxil olmadan metrodan istifadəsini asanlaşdırmaq məqsədi daşıyır.

Bəs, "Avtovağzal" və "Xocəsən" metro stansiyalarında girişin müvəqqəti olaraq ödənişsiz edilməsi sərnişin axınının bölüşdürülməsinə və xüsusilə "20 Yanvar" ərazisində nəqliyyat sıxlığının azalmasına nə dərəcədə təsir göstərə bilər və bu təcrübənin digər metro stansiyalarında və avtobus marşrutlarında tətbiqi hansı nəticələrə səbəb ola bilər?
Mövzu ilə bağlı Sonxeber.az-a açıqlama verən nəqliyyat eksperti Yasin Mustafayev bildirib ki, sərnişin axınını "Avtovağzal" və "Xocəsən" stansiyalarına yönləndirmək üçün belə bir addım atılıb:

"İnsanlarda maddi maraq yaradılır ki, həmin stansiyalardan giriş pulsuzdur və sərnişinlər bu istiqamətə yönəlsinlər. Düzdür, bu, bəzi insanlar üçün kiçik güzəşt kimi görünə bilər. Amma böyük əksəriyyət üçün günə, həftəyə və aya hesabladıqda kifayət qədər vəsait edir. Tədbir müvəqqəti olsa da, "20 Yanvar" və "Əcəmi" stansiyalarında sıxlığın azaldılması baxımından müsbət addımdır. Artıq nəticəsini də görmək mümkündür. "Avtovağzal" və "Xocəsən" stansiyalarından istifadə edən sərnişinlərin sayı artıb. Bu da digər stansiyalarda sıxlığın azaldılmasına öz təsirini göstərir".

Röyalə Xəyal

Telegramda izləyin