Rusiya Kiyevdə mühüm körpüyə zərbə endirdi

Rusiya-Ukrayna müharibəsində gərginlik davam edir.

Sonxeber.az Reuters-ə istinadən xəbər verir ki, Rusiya qüvvələri Ukraynanın paytaxtı Kiyevə yeni hava zərbələri endirib. Hücum zamanı şəhərin cənubundakı mühüm körpü də hədəfə alınıb.

Kiyev meri Vitali Kliçko bildirib ki, Rusiya hava zərbələri nəticəsində Cənub körpüsünə ziyan dəyib. Hücumlar zamanı bir nəfər ölüb, iki nəfər yaralanıb. Şəhərdə yaşayış binası və məktəb də zərər görüb. Zərbələrdən sonra Cənub və Paton körpüləri nəqliyyat üçün bağlanıb, Metro körpüsündə isə hərəkət məhdudlaşdırılıb. Bu, Kiyevdə nəqliyyatın fəaliyyətinə ciddi təsir göstərib. Digər tərəfdən, Ukrayna Prezidenti Vladimir Zelenski ölkəsinin FP-7 taktiki ballistik raketindən ilk dəfə döyüş şəraitində istifadə etdiyini açıqlayıb.

Bildirilir ki, raketin uçuş məsafəsi təxminən 200 kilometrdir. Ukrayna həmçinin Rusiya ərazisindəki neft və sənaye obyektlərinə qarşı dron hücumlarını davam etdirir. Reuters-in məlumatına görə, Volqoqradda neft emalı zavodunun da hücuma məruz qaldığı bildirilib.

Müəllif: İlkin Məmmədkərimov

Telegramda izləyin