Bu şəxslərə əlavə MAAŞ ÖDƏNİLMƏLİDİR - AÇIQLAMA

Əmək müqaviləsi ilə çalışan işçilərin artıq iş saatlarında, istirahət və bayram günlərində, gecə vaxtı, eləcə də ağır və zərərli əmək şəraitində işləməsi zamanı əlavə ödəniş məsələsi əmək qanunvericiliyi ilə tənzimlənir. Bu ödənişlərin düzgün hesablanması və vaxtında verilməsi işçinin əmək hüquqlarının qorunması baxımından mühüm əhəmiyyət daşıyır.

Bəs, işçilərin artıq iş saatlarına, istirahət və bayram günlərində, gecə növbəsində, eləcə də ağır və zərərli iş şəraitində fəaliyyətinə görə əlavə ödənişlər necə hesablanmalıdır və işəgötürən bu ödənişləri vermədikdə işçi hüquqlarını qorumaq üçün hansı hüquqi addımları ata bilər?
Mövzu ilə bağlı Sonxeber.az-a açıqlama verən vəkil Əkrəm Həsənov bildirib ki, bütün bu iş saatlarına, əlavə iş saatlarına, istirahət və bayram günlərində görülən işlərə görə işçiyə qanunvericiliyə uyğun olaraq ikiqat əməkhaqqı ödənilməlidir.

"İşəgötürən tərəfindən bu ödənişlər verilmədiyi halda vətəndaş öz hüquqlarını müdafiə etmək üçün həm Əmək Müfəttişliyinə şikayət edə, həm də məhkəməyə müraciət edərək ona ödənilməli olan məbləğin tələb olunmasını istəyə bilər. Sadəcə, vətəndaş nəzərə almalıdır ki, əməkhaqqının və digər ödənişlərin tələb edilməsi ilə bağlı müraciət müddəti bir ildir. Buna görə də işçi hüquqlarının pozulduğunu düşündüyü halda, qanunla müəyyən edilmiş müddəti nəzərə alaraq vaxtında müraciət etməlidir".

Röyalə Xəyal

Telegramda izləyin