Sökülən mənzil sahiblərinə ödəniləcək kompensasiya necə hesablanmalıdır? - AÇIQLAMA

Bakının bir neçə ərazisində 20-yə yaxın binanın sökülməsi planlaşdırılır. Söküntü zamanı mənzil sahiblərinə ödəniləcək kompensasiyanın məbləği və onun hesablanma qaydası sakinlər arasında narazılıq yarada bilər. Xüsusilə təklif olunan məbləğin əmlakın real bazar dəyərinə uyğun olub-olmaması mülkiyyətçilərin hüquqlarının qorunması baxımından mühüm məsələdir.

Bəs, söküntü zamanı mənzil sahiblərinə ödəniləcək kompensasiya hansı meyarlar əsasında hesablanmalıdır və sakinlər təklif olunan məbləğlə razı olmadıqda öz hüquqlarını qorumaq üçün hansı hüquqi addımları ata bilərlər?
Mövzu ilə bağlı Sonxeber.az-a açıqlama verən əmlak məsələləri üzrə ekspert Fərid Cəfərli bildirib ki, Bakıda binaların sökülməsi zamanı mənzil sahibinə təklif edilən kompensasiya yalnız sabit "kvadratmetr qiyməti" ilə əsaslandırıla bilməz.

"Kompensasiyanın məbləği əmlakın real bazar dəyəri, mənzilin xüsusiyyətləri və söküntünün hansı hüquqi əsasla aparılması nəzərə alınmaqla müəyyən edilməlidir. İlk növbədə söküntünün dövlət ehtiyacları, yoxsa özəl tikinti layihəsi çərçivəsində həyata keçirildiyi aydınlaşdırılmalıdır. Dövlət ehtiyacları üçün əmlak alınarkən qanunvericilik ədalətli kompensasiyanın ödənilməsini nəzərdə tutur. Yaşayış sahəsinin alınması zamanı müəyyən şərtlərlə "çətinliklərə görə kompensasiya" mexanizmi də tətbiq oluna bilər. Sakin kompensasiya təklifini alarkən yalnız məbləğə deyil, onun hansı komponentlərdən ibarət olduğuna diqqət etməlidir. Müqavilədə yeni mənzilin sahəsi və ünvanı, ödəniş və təhvil müddəti, kirayə və köçmə xərcləri, gecikmə halında məsuliyyət, köhnə mənzilin boşaldılması və mülkiyyət hüququnun keçirilməsi kimi məsələlər açıq göstərilməlidir".

Ekspert bildirib ki, bazar qiyməti isə sadəcə internet elanlarının orta göstəricisi deyil:

"Qiymətləndirmə zamanı ərazinin, binanın, mərtəbənin, sahənin, otaq sayının və təmir vəziyyətinin nəzərə alınması vacibdir. Sakinlər söküntünün hüquqi əsasını, qiymətləndirmə hesabatını, kompensasiya təklifini, müqavilə layihəsini və ödəniş-köçürülmə şərtlərini tələb edə bilərlər. Təkliflə razılaşmadıqda müstəqil qiymətləndirmə aparılması, yazılı etiraz verilməsi və zərurət yaranarsa, hüquqi müdafiə yollarından istifadə edilməsi mümkündür. Əsas prinsip budur: mülkiyyətçidən əmlak alınırsa, onun əvəzində hüquqi əsaslandırılmış və ədalətli kompensasiya verilməlidir. Razılaşmadığı sənədi isə sakin tələsik imzalamamalı, əvvəlcə kompensasiyanın hüquqi və qiymətləndirmə əsaslarını araşdırmalıdır".

Röyalə Xəyal

Telegramda izləyin