AQTA qida təhlükəsizliyinə nəzarətdə süni intellektdən istifadə edəcək

Qida təhlükəsizliyinə nəzarətdə yeni texnologiyalardan istifadə genişləndiriləcək. 2027-2032-ci illər üçün Dövlət Proqramında qida zəncirinə nəzarətin daha rəqəmsal və risk əsaslı modelə keçirilməsi, informasiya sistemləri arasında inteqrasiyanın artırılması və süni intellektdən istifadə nəzərdə tutulub. AQTA-nın açıqlamasına görə, AQTİS-də risklərin təhlili üçün süni intellekt modelinin hazırlanması, həmçinin sahibkarlar tərəfindən rəqəmsal monitorinq və sensor texnologiyaların tətbiqinin təşviqi planlaşdırılır.

Bəs süni intellekt qida təhlükəsizliyinə nəzarətdə konkret olaraq hansı imkanları yaradacaq? Yeni sistemlər təhlükəli məhsulların və qida zəncirindəki risklərin daha erkən aşkarlanmasına necə kömək edə bilər və bu dəyişiklik istehlakçı üçün nə vəd edir?
Mövzu ilə bağlı sağlam qida təbliğatçısı, Gənclərin Töhfəsi İctimai Birliyinin sədri Asim Vəliyev Sonxeber.az-a açıqlamasında bildirdi ki, Qida Təhlükəsizliyi Agentliyinin dövlət proqramı çərçivəsində rəqəmsal həllər və süni intellektdən istifadəni genişləndirməsi sferada keyfiyyətcə yeni bir mərhələnin başlanğıcıdır. Onun sözlərinə görə, süni intellekt və rəqəmsal monitorinq sistemləri sayəsində risklərin qiymətləndirilməsi avtomatlaşacaq: "Bu hal inspektorların obyektiv qərar verməsini təmin edəcək və insan faktoru ilə bağlı xətaları minimuma endirəcək. Əvvəllər nöqsanlar yalnız yoxlama zamanı, ya şikayət əsasında ortaya çıxırdısa, rəqəmsal sistemlər real vaxt rejimində mühit temperaturu, saxlanma şəraiti və yararlılıq müddəti kimi kritik göstəriciləri izləməyə imkan verəcək. Problem baş vermədən öncə xəbərdarlıq mexanizmi işə düşəcək.

Sahibkarlar anlayacaqlar ki, nəzarət mexanizmi daha şəffaf və fasiləsizdir. Bu da saxlama müddəti keçmiş, keyfiyyətsiz məhsulların piştaxtaya, mətbəxə daxil olmasının qarşısını alacaq. Tarladan, ya istehsalatdan süfrəyədək olan bütün zəncir rəqəmsallaşdığı üçün hər hansı zəhərlənmə, keyfiyyətsizlik riski yarandıqda, problemin mənbəyi dəqiqələr ərzində tapılacaq".

Müəllif: İlkin Məmmədkərimov

Telegramda izləyin