Maaş və pensiyalar artacaq: Qiymətlər də bahalaşa bilər? - Ekspertdən AÇIQLAMA

Gələn il maaş və pensiyaların artırılması əhalinin gəlirlərinin yüksəlməsinə və alıcılıq qabiliyyətinin yaxşılaşmasına şərait yarada bilər. Bununla yanaşı, əhalinin gəlirlərinin artması istehlak tələbinin yüksəlməsinə səbəb olmaqla, təklifin tələbi tam qarşılamadığı halda bəzi məhsul və xidmətlərin qiymətlərinə təzyiq yarada bilər. Bu baxımdan, gəlirlərin artımının inflyasiyaya mümkün təsiri və qiymət sabitliyinin qorunması üçün görüləcək tədbirlər də diqqət çəkir.

Bəs, gələn il maaş və pensiyaların artırılması istehlak tələbinə və qiymətlərə necə təsir göstərə bilər, bu artım inflyasiyanın yüksəlməsinə səbəb ola bilərmi və qiymət artımının qarşısını almaq üçün hansı iqtisadi tədbirlərin görülməsi vacibdir?
Mövzu ilə bağlı Sonxeber.az-a açıqlama verən Liberal İqtisadçılar Mərkəzinin sədri Akif Nəsirli bildirib ki, maaş və pensiyaların artırılması əhalinin nominal gəlirlərini yüksəldərək alıcılıq qabiliyyətinə müsbət təsir göstərə bilər:

"Xüsusilə gəlirlərinin böyük hissəsini gündəlik istehlaka yönəldən əhali qruplarında əlavə gəlirin əmtəə və xidmətlərə olan tələbi artırması mümkündür. Əgər bazarda təklif bu artan tələbi qarşılaya bilməsə, satıcıların qiymətləri yüksəltməsi və bunun inflyasiyaya əlavə təzyiq yaratması ehtimalı yaranır. Lakin maaş və pensiyaların artımını avtomatik olaraq inflyasiya yaradan amil kimi qiymətləndirmək düzgün olmaz. Əgər artan gəlirlər əsasən yerli istehsalın genişlənməsi, xidmətlərin həcminin artması və idxal imkanlarının genişlənməsi hesabına qarşılanarsa, tələb artımının qiymətlərə təsiri məhdud qala bilər".

Ekspert bildirib ki, problem daha çox gəlirlərin sürətlə artdığı, lakin mal və xidmət təklifinin eyni templə genişlənmədiyi halda meydana çıxır:

"Bu baxımdan əsas məsələ tələblə təklif arasında tarazlığın qorunmasıdır. Bunun üçün ərzaq və digər əsas istehlak məhsullarının istehsalının artırılması, aqrar sektorda məhsuldarlığın yüksəldilməsi, logistika və anbar infrastrukturunun yaxşılaşdırılması, idxal kanallarının şaxələndirilməsi vacibdir. Rəqabətin gücləndirilməsi də qiymətlərin süni şəkildə artırılmasının qarşısını almaq baxımından əhəmiyyətlidir".

Onun sözlərinə görə, büdcə xərclərinin artımı da nəzarətdə saxlanmalıdır:

"Maaş və pensiyaların yüksəldilməsi ilə yanaşı dövlət xərclərinin iqtisadiyyatın real imkanlarından daha sürətlə genişlənməsi daxili tələbi əlavə olaraq artıra bilər. Buna görə sosial ödənişlərin artırılması ilə paralel olaraq fiskal və pul siyasətinin koordinasiyası, inflyasiya gözləntilərinin idarə olunması və manat likvidliyinin həddindən artıq genişlənməsinin qarşısının alınması vacibdir. Ən optimal yanaşma gəlirlərin artırılmasını məhdudlaşdırmaq deyil, artan gəliri qarşılayacaq istehsal və xidmət imkanlarını genişləndirməkdir. Əgər maaş və pensiyaların artımı real iqtisadi artım, məhsuldarlıq və təklifin genişlənməsi ilə dəstəklənərsə, bu, həm əhalinin alıcılıq qabiliyyətini yüksəldə, həm də inflyasiya təzyiqini nəzarətdə saxlaya bilər".

Röyalə Xəyal

Telegramda izləyin