Azərbaycanda kredit faizləri niyə yüksəkdir? - Ekspertdən AÇIQLAMA

Azərbaycanda kredit faizlərinin yüksək olması həm vətəndaşların, həm də biznes subyektlərinin maliyyə resurslarına çıxışını çətinləşdirən əsas məsələlərdən biridir. Bankların daha ucuz və uzunmüddətli maliyyə resurslarına çıxışının genişləndirilməsi kreditlərin maya dəyərinin azalmasına və faiz dərəcələrinin aşağı düşməsinə şərait yarada bilər. Bununla yanaşı, bankların maliyyələşmə imkanlarının artırılmasının kredit bazarına və borcalanların ödəniş imkanlarına təsiri də nəzərə alınmalıdır.

Bəs, Azərbaycanda kredit faizlərinin aşağı salınması üçün bankların maliyyələşmə imkanlarının genişləndirilməsi nə dərəcədə realdır və bankların daha ucuz, uzunmüddətli resurslara çıxışının təmin edilməsi kredit faizlərinə və vətəndaşlar üçün kreditlərin əlçatanlığına necə təsir göstərə bilər?
Mövzu ilə bağlı Sonxeber.az-a açıqlama verən bank eksperti Əkrəm Həsənov bildirib ki, bankların əsas maliyyələşmə mənbələrindən biri vətəndaşların bank əmanətləridir:

"Ümumiyyətlə, müştərilərin bank hesablarında olan vəsaitlər də bankların istifadə etdiyi əsas resurslardandır. Bundan başqa, banklar Mərkəzi Bankın uçot dərəcəsi ilə təqdim etdiyi kreditlərdən də yararlana bilirlər. Bəzi banklar xaricdən də maliyyə vəsaiti cəlb edə bilirlər. Lakin xaricdən vəsait əsasən milli valyutada deyil, xarici valyutada cəlb olunur. Bank isə həmin vəsaiti milli valyutada kredit şəklində təqdim etməlidir. Bu baxımdan xarici valyutada cəlb olunan vəsaitlərin istifadəsi müəyyən çətinliklər yaradır. Milli valyutada əsas mənbə isə bank əmanətləridir. Vətəndaşlar aşağı faizlə əmanət yerləşdirmək istəmədikdə vəsaitlərini banklardan çəkə bilərlər. Bu da banklar üçün müəyyən risk yaradır. Son dövrlərdə əmanət faizlərində müəyyən azalma müşahidə olunur".

Ekspert bildirib ki, digər mənbə Mərkəzi Bankın uçot dərəcəsi ilə təqdim etdiyi vəsaitlərdir:

"Lakin Mərkəzi Bank bütün banklara istənilən həcmdə kredit vermir. Bu, onun pul-kredit siyasətinə uyğun şəkildə həyata keçirilir. Çünki həddindən artıq kreditləşmə inflyasiyaya səbəb ola bilər. Müştərilərin bank hesablarında olan vəsaitlər də bankların resurs bazasında mühüm yer tutur. Son illərdə sahibkarların bank hesablarından vəsait çıxarması ilə bağlı müəyyən məhdudiyyətlər də tətbiq olunub. Ümumilikdə isə Azərbaycanda həm əmanət, həm də kredit faizlərinin yüksək olmasının əsas səbəblərindən biri kapital bazarının kifayət qədər inkişaf etməməsidir. Şirkətlər birbaşa kapital bazarına çıxaraq istiqrazlar vasitəsilə vəsait cəlb edə bilmirlər. Kapital bazarının daha yaxşı inkişaf etməsi bu baxımdan müsbət nəticələr verə bilər".

Röyalə Xəyal

Telegramda izləyin