"Bizim şəxsi münasibətlərimizin sənətə heç bir aidiyyatı olmayıb" - FOTOLAR

"Ağakişi müəllim heç vaxt sənətinə görə heç kimə güzəştə getməyib, sənətində çox ciddi adam olub. Bizim şəxsi münasibətlərimizin sənətə heç bir aidiyyatı olmayıb. Obrazı kimə uyğun görübsə, ona da verib. Mənə verdiyi rolların arasında baş rol da, ikinci dərəcəli də, hətta "massofka" da olub. Mən ümumiyyətlə hər zaman onun tamaşalarına, məşqlərinə oturub baxırdım, özümü zənginləşdirirdim. Bəlkə də o hansısa münasibətə görə mənə o rolu verə bilər, amma sabah rolu oynayanda səhnə ilə təkbaşına mən qalıram, rejissor görünmür. Həmin rol ilə, oyunumla mən onu biabır edəcəkdimsə, bunu nə özünə, nə də mənə bağışlaya bilərdi. Sənətə bu gözlə baxanlar da mənə qəribə görünür, çünki sənət güzgüdür, göz qabağındadır"
Sonxeber.az xəbər verir ki, bunu Moderator.az-a açıqlamasında tanınmış aktrisa, əməkdar artist Mehriban Abdullayeva deyib. O həyat yoldaşı, tanınmış rejissor, xalq artisti Ağakişi Kazımovun ölümü ilə hələ də barışmadığını bildirib.

"İndi mən başa düşürəm ki, onsuz olmaq, həyatla barışıb yaşamaqdır. Bu tam yaşamaq deyil. Hər dəfə onun şəkillərinə baxdıqca, evin içində fırlandıqca hər şey gözümün qabağına gəlir. Onunla keçirdiyim hər gün, hər an, hər saniyəni xatırlayıram. Bir dəqiqə də olsun o mənim yadımdan çıxmır. Hətta elə nüanslar var ki, o mənim içimi çox ağrıdır. Bəzən elə hala çatıram ki, çalışıram beynimdən çıxarım, unutdurum. Amma hələ ki, o vəziyyətə gəlib çatmamışam ki, özüm olum, hər şeyi unudum. Hər şeyi əlbəttə ki, unutmaq olmaz. Bəlkə də bir az yaradıcılığımda da fasilə var, başımı işlə qata bilmirəm. Ona görə də onun yoxluğu mənə çox təsir edir. Bəlkə də başım sənətlə qarışsa müvəqqəti də olsa yaxşı olardım. Ona görə də çox, həddindən artıq gərginəm. Bu gərginlik məndən nə vaxt çıxacaq, deyə bilmərəm! Sözün düzünü deyim ki, bəzən mənə elə gəlir ki, o məni belə qoyub gedə bilməz, bu saat hardansa çıxıb gələcək və bu halıma görə mənə deyəcək ki, Mehriban, özünü topla, yığışdır, belə olmaz. Onun səsini eşitmək istəyirəm ki, məni silkələsin, bax bunu gözləyirəm" deyə aktrisa bildirib.

Telegramda izləyin