"Ermənistanın məqsədi divident qazanmaqdır" - Hərbi ekspert

Rusiya Federasiyası sülhməramlı kontingentinin müvəqqəti yerləşdiyi Azərbaycan ərazisindəki qeyri-qanuni erməni silahlı dəstələrinin üzvləri avqustun 3-ü səhər saatlarında Laçın rayonu istiqamətində yerləşən Azərbaycan Ordusunun bölmələrinin mövqelərini intensiv atəşə tutub.
Nəticədə müddətli həqiqi hərbi xidmət hərbi qulluqçusu əsgər Kazımov Anar Rüstəm oğlu aldığı güllə yarasından şəhid olub.
Bununla bağlı Sonxeber.az-a açıqlama verən hərbi ekspert Ramil Məmmədli bildirib ki, təxribatın baş vermə səbəbinini Ermənistanın hansısa ərazini zəbt etmək kimi niyyətində axtarmaq doğru deyil. Məqsəd beynəlxalq ictimaiyyətin diqqətini münaqişəyə çəkmək və maksimum şəkildə divident qazanmaqdır:
"Son vaxtlar baş verən təxribatların səbəbi qlobal məsələdir. Çox yaxşı bilirik ki, Ermənistan 2020-ci il 10 noyabrdan sonra bütün vasitələrdən istifadə edərək münaqişənin həllində divident qazanmağa və ermənilərin hüquqi statusunun müəyyənləşdirilməsinə çalışır. Bu Ermənistanın xarici güclərdən ilham alması ilə bağlıdır. Əlbəttə, həm Rusiyanın, həm Qərbin özünə məxsus marağı var. Hesab edirəm ki, daha çox Qərbin marağı hiss olunur. Çünki Qərb həm müharibə zamanı, həm müharibədən sonra münaqişənin bu formatda həllinə maraqlı olmadığını açıq şəkildə bəyan edib. Hətta ATƏT-in Minsk qrupu çərçivəsində yenidən danışıqlar aparılmasını təklif edib. Bu baxımdan təxribatın baş vermə səbəbinini Ermənistanın hansısa ərazini zəbt etmək kimi niyyətində axtarmaq doğru deyil. Çünki Ermənistan müharibədən sonra ordusunun 70 faizini həm canlı qüvvə baxımından, həm də silah-texnika baxımından itirib. Belə olan təqdirdə ötən 20 ayda ordunun yenidən komplektləşməsi, döyüş hazırlığının artırılması mümkün deyil. Ermənistanın açıq müharibəyə getmək kimi fikrinin olması haqqında deyilən mülahizələrlə razı deyiləm. Sadəcə məqsəd beynəlxalq ictimaiyyətin diqqətini münaqişəyə çəkmək və maksimum şəkildə divident qazanmaqdır. Azərbaycan bu kimi halların qarşısını almaq üçün yeganə yol olaraq bölgədə anti-terror əməliyyatı həyata keçirməyi nəzərdə tuta bilər. Düşünürəm ki, Azərbaycan silahlı qüvvələrinin Əsgərən,Ağdərə istiqamətində həyta keçirəcəyi anti-terror əməliyyatı ermənilərin bundan sonra belə addımlar atmasının qarşısını alacaq.
Mövcud vəziyyət qismən Rusiyanın da maraqlarına xidmət edir. Rusiya sülhməramlılarının fəaliyyətini mənfi qiymətləndirirəm. Məsələ burasındadır ki, Rusiya sülhməramlıları gəldikləri ilk gündən ermənilərin yaşadığı ərazilərdə erməni silahlı qüvvələrini tərki-silah etmək əvəzinə humanitar tədbirlərin həyata keçirilməsi ilə məşğul oldular. Bunun özü ilk gündən yanlış addım idi. Bu, sülhməramlılara deyil, Rusiyanın rəsmi dövlət orqanlarına, Kremlinə yönələn ittihamdır. 10 noyabr bəyanatının 4-cü bəndinin icra olunması kimi öhdəliyi öz üzərinə götürən dövlər Rusiya Federasiyasıdır. Bu məsələdə fəal rol oynamalıdır. Ermənistanın mövcud vəziyyətdə hansı manevirlər etdiyini də diqqətdən yayındırmaq lazım deyil. Açıq şəkildə bildirmək lazımdır ki, Ermənistan ötən 1 ildə sözün əsl mənasında Qərblə əməkdaşlıq edərək məsələni öz xeyrinə dəyişməyə çalışır".

Şəbnəm Lətifi

Telegramda izləyin