"8 Noyabr Azərbaycanın 30 ilə yaxın həsrətlə gözlədiyi qələbənin müjdə günüdür" - Vüqar İsgəndərli

8 Noyabr 2020-ci il tarixində Azərbaycan ordusu Şuşanı işğaldan azad edərək Vətən müharibəsini qələbə ilə yekunlaşdırdı.
Bununla bağlı Sonxeber.az-a danışan Milli Məclisin deputatı Vüqar İsgəndərov bildirib ki, 8 Noyabr Azərbaycanın 30 ilə yaxın həsrətlə gözlədiyi qələbənin müjdə günüdür. Bu gün hər bir azərbaycanlının xatirəsində şərəfli,qürurlu gün kimi qalacaq:

"8 Noyabr Azərbaycanın 30 ilə yaxın həsrətlə gözlədiyi qələbənin müjdə günüdür. Biz həmin gün erməni vandallarının atəşkəsi pozaraq vətənimizə hücum etməsi nəticəsində Ali Baş Komandanın döyüşə qatılmaq əmrinə qoşulan minlərlə əsgər və zabitimizi qürurla andığımız gündür. 8 Noyabr Azərbaycan tarixinə qızıl hərflərlə yazılacaq. 44 gün əks hücum əməliyyatını həyata keçirərək torpaqlarımızı düşmən tapdağından azad etdik, qürurumuzu özümüzə qaytardıq, müzəffər xalq olduq. Bu qələbəni bizə yaşadan Ali Baş Komandanın rəhbərliyi altında vuruşan mübariz, qətiyyətli, şərəfli Azərbaycan əsgər və zabitləri oldu. Çünki həmin döyüş qələbəmizdə 3 minə yaxın igid oğullarımızı itirdik. O oğullar ki, yarıdan çoxu hələ Qarabağı görməmişdi. Onlar televiziyada və yaxud digər mənbələrdən Qarabağı görürdülər. Çünki onların bir çoxu anadan olanda artıq həmin bölgəmiz işğal olunmuşdu. Amma Azərbaycanın vətən oğulları, qeyrətli əsgər və zabitlərimiz dişləri, dırnaqları, canları, qanları ilə vuruşaraq dünyaya bir nümunə göstərdilər. O nümunə göstərdi ki, vətən uğrunda canından da keçmək, əzalarını qoymaq olar. Şəhid və qazilərimiz bir dastan yazdılar. Biz 8 Noyabrı ağlamadan, sızlamadan qürur günümüz kimi tarixə yazdıq. Bu igid qəhrəman övladlarımızı həmin gün anacaq, onların ruhlarına dualar oxuyacaq və qəhrəmanlıqları barəsində danışacağıq. Düşünürəm ki, onların həyat yolu hər birimiz üçün bir nümunədir ".

Şəbnəm Lətifi

Telegramda izləyin