3 yaşlı bu uşaq 7 dildə 100-dək sayır - FOTO-VİDEO

Britaniyanın Portished şəhərindən olan 3 yaşlı Teddi Hobbs ana dilindən əlavə, 6 xarici dildə 100-dək saymağı öyrənib və "Mensa" beynəlxalq vunderkindlər klubunun ölkə üzrə ən gənc üzvü olub.

BiG.AZ xəbər verir ki, bu barədə "The Mirror" yazır.

Teddi oxumağı hələ 2 yaşında, "COVİD-19" pandemiyası dövründəki qapanma zamanı öyrənib.

Onun 31 yaşlı anası Betin sözlərinə görə, valideynlər kitaba həvəs göstərən Teddini çoxlu kitabla təmin ediblər və artıq 2 yaş 2 aylığında uşaq sərbəst şəkildə kitab oxumağı bacarıb.

Milad bayramında valideynləri ona oynamaq üçün planşet hədiyyə ediblər. Lakin Teddi oyun əvəzinə, planşetlə mandarin çincəsində 100-dək saymağı öyrənib.

Övladlarının istedadını görən Bet və Uill cütlüyü nəhayət "Mensa" vunderkindlər klubuna müraciət ediblər. Həmin vaxt 3 yaş 7 aylıq olan uşaq təşkilatın ekspertləri ilə bir saatlıq onlayn-müsahibədən uğurla keçib. O, 160-dan 139 bal toplayıb. Məlum olub ki, Teddinin İQ (İntellekt əmsalı) səviyyəsi 99,5-dir.

3 yaş 8 aylığında bu uşaq hərf və sözləri 8 yaş 10 aylıq uşağın səviyyəsində ayırd edə bilib.

Teddi "Mensa" sertifikatını alaraq bu ölkədə təşkilatın ən gənc üzvünə çevrilib. Hazırda o, uşaq bağçasına gedir, sentyabr ayında isə məktəbə getməyi planlaşdırır.

Teddi 6 xarici dildə 100-dək saymağı bacarır. Bura mandarin çincəsi, valli, fransız, ispan və alman dilləri daxildir.

Uşağın anası istedadlı uşaqlar üçün xeyriyyə təşkilatı olan "Potential Plus" ilə əlaqə saxlayaraq burada konsultasiyadan keçib. Betin özü 4 yaşında oxumağı öyrənib.

Təhsildən əlavə, Teddi üzgüçülük və gimnastika ilə maraqlanır. O, 15 aylıq bacısı Pippa üçün kitab oxumağı sevir. Böyüyəndə həkim olmağı düşünən vunderkind hazırda ölkələrin bayraqlarını öyrənməyə başlayıb.

"Teddinin yaxşı bir insan olmasını və həyatdan zövq almasını istəyirik. Hər bir valideynin istəyi də elə budur", - deyə Bet vurğulayıb.

Telegramda izləyin