İsrail təyyarələri Qəzza zolağına hava zərbələri endirib

İsrail döyüş təyyarələri Qəzzada Fələstin silahlı qruplaşmalarına məxsus hərbi bölgəyə hava hücumu təşkil edib.

Sonxeber.az xəbər verir ki, İsrail təyyarələri Qəzzanın mərkəzi hissəsində Fələstin silahlı qruplaşmalarına aid hərbi bölgəyə bir-birinin ardınca hücum edib.

Fələstin Səhiyyə Nazirliyi hücumda ölən və ya yaralananların olub-olmaması ilə bağlı açıqlama verməyib.

Hücum şiddətli partlayışlara və ətrafdakı evlərə ziyan vurub.

HƏMAS-ın silahlı qanadı İzzəddin əl-Qəssam Briqadaları açıqlamasında bildirib ki, hava hücumundan müdafiə qüvvələri səhər saatlarında Qəzza zolağı üzərində yer-hava raketləri və zenit raketləri ilə İsrail təyyarələrinə cavab verib.

İsrail ordusundan verilən açıqlamada Qəzzadan sərhədə yaxın yəhudi yaşayış məntəqələrinə doğru 2 raket atıldığı və bunun hava hücumundan müdafiə sistemi tərəfindən qarşısı alındığı açıqlanıb.

Qeyd edək ki, dünən səhər saatlarında İsrail qüvvələrinin İordan çayının qərb sahilinin şimalındakı Cenin Qaçqınlar Düşərgəsinə təşkil etdiyi basqında 9 fələstinli həlak olub.

İsrail əsgərlərinin İordan çayının qərb sahilində və Şərqi Qüdsdə açdığı atəş nəticəsində ilin əvvəlindən biri qadın, 5-i uşaq olmaqla ümumilikdə 29 fələstinli ölüb.

Şəbnəm Lətifi

Telegramda izləyin